(ភ្នំពេញ)៖ ប្រធានាធិបតីសហរដ្ឋអាមេរិក លោក ដូណាល់ ត្រាំ នៅថ្ងៃទី ០១ ខែសីហា ឆ្នាំ ២០២៥ នេះបានសម្រេចយកពន្ធកម្ពុជាត្រឹមតែ ១៩% បន្ទាប់ពីការជួបចរចាជាមួយភាគីអាមេរិកជាច្រើនលើក។
លោក Casey Barnett ប្រធានសភាពាណិជ្ជកម្ម អាមេរិកនៅកម្ពុជា បានបញ្ជាក់ប្រាប់ឱ្យដឹងថា ការចរចាពាណិជ្ជកម្មកម្ពុជា-អាមេរិក ដឹកនាំដោយលោក ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា មានភាពជោគជ័យជាច្រើន ចាប់តាំងពីខែមេសា រហូតមកដល់ពេលនេះ រដ្ឋាភិបាលកម្ពុជា មានទំនាក់ទំនងល្អ ជាមួយរដ្ឋាភិបាលអាមេរិក ខណៈអត្រាពន្ធពីអាមេរិកបានធ្លាក់ចុះ។
លោកបានបញ្ជាក់ នៅព្រឹកថ្ងៃទី៣១ ខែកក្កដាថា ប្រសិនបើកម្ពុជាមិនមាន បញ្ហាព្រំដែនជាមួយប្រទេសថៃ កម្ពុជានឹងមានអត្រាពន្ធ ល្អពីអាមេរិកដែរ ដោយសារអាមេរិក មានទំនាក់ទំនងល្អជាមួយ ប្រទេសថៃជាច្រើនឆ្នាំ ហើយមានប្រវត្តិសាស្ត្រជាយូរឆ្នាំ ជាមួយប្រទេសថៃ ពេលមានបញ្ហានៅព្រំដែន អាមេរិកពិបាកប្រកាស ឱ្យប្រទេសកម្ពុជាពន្ធគយទាប ហើយរង់ចាំការ បញ្ចប់សង្គ្រាមនៅព្រំដែន។
ប្រធានសភាពាណិជ្ជកម្ម អាមេរិកនៅកម្ពុជា បន្ថែមថា ជាភ័ព្វសំណាង ដែលប្រធានាធិបតីត្រាំ សម្រេចដាក់គំនាបលើប្រទេសថៃ ដើម្បីឱ្យថៃ ឈប់ធ្វើហិង្សា ប្រសិនបើថៃមិនឈប់ហិង្សានៅព្រំប្រទល់គឺ លោកនឹងដាក់ពន្ធខ្ពស់មែនទែន ជាមួយប្រទេសថៃ ដែលធ្វើឱ្យថៃខ្លាចដួលរលំសេដ្ឋកិច្ច។
លោក Casey Barnett យល់ឃើញថា៖ «គំនាបពីប្រធានាធិបតីអាមេរិក នាំឱ្យការបញ្ចប់សង្គ្រាម ឆាប់រហ័ស ហើយខ្ញុំជឿថា ប្រទេសទាំងពីរនឹង បន្តរក្សាសន្តិភាព និងបន្តដោះស្រាយបញ្ហានេះ។
អ្វីដែលខ្ញុំចង់បានគឺ ២០% ប្រសិនបើក្រោមនេះ យើងនឹងស្មើនឹងវៀតណាម និងឥណ្ឌូនេស៊ី ដែលជាគូប្រកួតប្រជែងរបស់យើង សម្រាប់វិស័យឧស្សាហកម្មរោងចក្រ ដូច្នេះបើយើងបាន ២០% យើងនឹងបន្តទទួលបាន ការវិនិយោគជាច្រើន៕
