(ខេត្តកែប)៖ គិតចាប់ពីថ្ងៃទី២៨ និង ២៩ ខែកក្កដា ឆ្នាំ២០២៥ កន្លងមកនេះលោកឧត្តមសេនីយ៍ទោ សម្បត្តិ សុធារដ្ឋ ស្នងការនៃស្នងការដ្ឋាននគរបាលខេត្តកែប រួមជាមួយលោក លោកស្រីស្នងការរង និងមន្ត្រីកងកម្លាំងនគរបាល ចំណុះស្នងការដ្ឋាននគរបាលខេត្ត បានទទួលសម្ភារ: គ្រឿងឧបភោគបរិភោគមួយចំនួន រួមទាំងសម្លៀកបំពាក់ ពីសប្បុរសជនចូលរួមឧបត្ថម្ភ ដល់ស្នងការដ្ឋាននគរបាលខេត្តកែប ដើម្បីរៀបចំដឹកនាំជញ្ជូនយកទៅជំនួយដល់កងទ័ពជួរមុខ និងបងប្អូនប្រជាពលរដ្ឋ ដែលបានភៀសសឹក មកស្នាក់នៅទីទួលសុវត្ថិភាព ក្នុងនោះថវិការដែលទទួលបានចំនួន ៩,៦៣២ដុល្លារ។
ចំពោះសម្ភារ: គ្រឿងឧបភោគបរិភោគ និងថវិកាទាំងអស់ ដែលបានមកពីការ ចូលរួមយ៉ាងច្រើនកុះករ ពីសំណាក់បងប្អូន កងកម្លាំងនគរបាល នៃស្នងការដ្ឋាននគរបាលខេត្តកែប អាជីវករ ប្រជាពលរដ្ឋក្នុងនិងក្រៅប្រទេស សិស្សានុសិស្ស និងជនជាតិបរទេសនោះ ស្នងការដ្ឋាននគរបាលខេត្តកែប នឹងនាំយកទៅចែក ជូនវីរ:កងទ័ពជួរមុខ និងបងប្អូនប្រជាពលរដ្ឋដែលភៀស សឹកនាពេលខាងមុខនេះ។
លោកឧត្តមសេនីយ៍ទោ សម្បត្តិ សុធារដ្ឋ ស្នងការ នៃស្នងការដ្ឋាន នគរបាលខេត្តកែប បានបញ្ជាក់អោយដឹង នៅព្រឹកថ្ងៃទី៣០ ខែកក្កដា ឆ្នាំ២០២៥ថា ក្នុងនាមថ្នាក់ដឹកនាំគណៈ ស្នងការនគរបាលខេត្តកែប លោកសូមថ្លែង អំណរអរគុណយ៉ាងជ្រាលជ្រៅ ដល់បងប្អូនជា សប្បុរសជនទាំងអស់ ដែលបានចំណាយថវិកា សម្ភារៈ និងគ្រឿងឧបភោគបរិភោគ ជួយគ្នាក្នុងគ្រាជួប ទុក្ខលំបាកនាពេលនេះ។ សប្បុរសជននៅតែ អាចបន្តចូលរួមបរិច្ចាគ តាមរយ: គណនីធនាគាររបស់លោកផ្ទាល់៕ សេង ណារិទ្ធ
