(ភ្នំពេញ)៖ “ក្រសួងការបរទេស និងសហប្រតិបត្តិការអន្តរជាតិ សូមធ្វើការបដិសេធចំពោះ ការចោទប្រកាន់ ដោយគ្មានមូលដ្ឋាន របស់ក្រសួងការបរទេសថៃ ក្នុងពេលកិច្ចប្រជុំជាមួយ អ្នកសារព័ត៌មាននៅថ្ងៃទី២៩ ខែកក្កដានេះ ជាពិសេសគឺការលើកឡើងថា កងកម្លាំងប្រដាប់អាវុធកម្ពុជា រំលោភបំពានទៅលើកិច្ច ព្រមព្រៀងឈប់បាញ់គ្នា។ ឯកឧត្តមអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ មានប្រសាសន៍ នារសៀលម៉ោង១៦៖១៥នាទី ថ្ងៃទី៣០ ខែកក្កដា ឆ្នាំ២០២៥ ។
កម្ពុជាសូមអះអាងសារជាថ្មីម្តងទៀតថា កងកម្លាំងរបស់កម្ពុជា បានគោរពយ៉ាងត្រឹមត្រូវទៅតាមកិច្ចព្រមព្រៀងស្តីពីបទឈប់បាញ់ រវាងប្រទេសទាំងពីរ។
ការលើកឡើងថា កងទ័ពកម្ពុជាបានបន្តវាយ ប្រហារបន្ទាប់ពីកិច្ចព្រមព្រៀង ឈប់បាញ់គ្នាចូលជាធរមាន គឺជាការលើកឡើងដោយគ្មានមូលដ្ឋាន និងផ្ទុយពីការពិតទាំងស្រុង ពីអ្វីដែលបានកើតឡើងនៅព្រំដែនប្រទេសទាំងពីរ”។
