(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នារសៀលថ្ងៃទី៣០ ខែកក្កដា ឆ្នាំ២០២៥ បានផ្ញើសារថ្លែងអំណរគុណ ធនាគារ វីង ( Wing Bank ) ដែលបានសម្រេចលុបចោលបំណុលទាំងស្រុងជូនដល់អតិថិជន ឬអ្នករួមខ្ចី ដែលជាយោធិនបានពលី ឬពិការ ក្នុងកិច្ចបំពេញប្រតិបត្តិការ ដោយផ្ទាល់ អំឡុងពេល ជម្លោះព្រំដែនកម្ពុជា–ថៃ។ សម្រាប់យោធិន ដែលបានរងរបួស ធនាគារ វីង សម្រេចលុបចោលបំណុល ៧៥%។
គួរជម្រាបជូនថា ការសម្រេចលុបចោលបំណុលនេះ បានធ្វើឡើងតបតាមការអំពាវនាវ របស់សម្តេចមហាបវរធិបតី ហ៊ុន ម៉ាណែត និងតបតាមសេចក្ដីណែនាំ របស់ធនាគារជាតិនៃកម្ពុជា និងដើម្បីជាការតបស្នង នូវភាពអង់អាចក្លាហាន ជូនយោធិនពលី ឬយោធិនពិការ ដែលបានលះបង់សាច់ស្រស់ ឈាមស្រស់ តស៊ូយ៉ាងមោះមុតក្នុង កិច្ចខិតខំប្រឹងប្រែងការពារ បូរណភាពទឹកដី និងស្វែងរកសន្តិភាព ជូនប្រជាជនកម្ពុជា ក្នុងអំឡុងពេលជម្លោះព្រំដែន កម្ពុជា–ថៃ។
