(ខេត្តបាត់ដំបង)៖ ចាប់តាំងពីមានការឈប់ប្រើប្រាស់ និងផ្ដាច់ចរន្តអគ្គិសនី របស់ប្រទេសថៃរួចមក នៅតាមបណ្ដាលស្រុកមួយចំនួន ដែលនៅជាប់នឹងខ្សែបន្ទាត់ព្រំដែនថៃ គឺមានការរអាក់រអួលញឹកញាប់ ដោយមិនដឹងមូលហេតុ ដែលបញ្ហានេះបែរជា ប្រធានអង្គភាពអគ្គិសនីបាត់ដំបង ឆ្លើយយករួចខ្លួនដោយ ពុំមានការទទួលខុសត្រូវឡើយ។
តាមកិច្ចសម្ភាសន៍របស់ អ្នកសារព័ត៌មានប្រចាំ ខេត្តបាត់ដំបង ដែលបានសាកសួរ ទៅប្រជាពលរដ្ឋ មួយចំនួនដែលលោករស់នៅ តាមបន្ទាត់ព្រំដែនកម្ពុជាថៃ ដូចជាស្រុកសំពៅលូន ស្រុកភ្នំព្រឹក នៅស្រុកកំរៀងជាដើម។
លោក មួន រិទ្ធិយ៉ា ដែលលោករស់នៅ ស្រុកសំពៅលូន បានលើកឡើងថា សម្រាប់ចរន្តអគ្គិសនី ដែលលោកប្រើប្រាស់រាល់ថ្ងៃគឺ ពុំមានបញ្ហាអ្វីនោះ ទេសម្រាប់ស្រុកសំពៅលូន គឺចរន្តអគ្គិសនីមិន មានការរអាក់រអួលឡើយ។
ដោយឡែកលោក ផាន់ សារ៉េត លោកក៏បានបញ្ជាក់ដែរថា សម្រាប់ចរន្តអគ្គិសនីនៅ ស្រុកភ្នំព្រឹកដែលលោកប្រើ ប្រាស់រាល់ថ្ងៃ ក៏ពុំមានការរអាក់រអួល អ្វីដែល ។ ប៉ុន្តែសម្រាប់អ្នកស្រី សោ សុខារី ដែលរស់នៅស្រុកកំរៀង បានបញ្ជាក់ថា ក្នុងមួយថ្ងៃចរន្តអគ្គិសនី មានការដាច់ញឹកញាប់ មានពេលខ្លះមានភ្លើង មិនបានប៉ុន្មាននាទីផងក៏ដាច់ទៅវិញទៀត មានន័យថាក្នុងមួយថ្ងៃៗ ចរន្តអគ្គិសនីដាច់ញឹកញាប់ ហើយក៏ដាច់ជារៀងរាល់ថ្ងៃផងដែរ ដែលចាប់តាំង ពីរាជរដ្ឋាភិបាលប្រកាស ឲ្យផ្ដាច់ចរន្តអគ្គិសនីថៃ ហើយងាកមកប្រើប្រាស់ ចរន្តអគ្គិសនីកម្ពុជាវិញមក។
ជុំវិញបញ្ហានេះ កាលពីរសៀលថ្ងៃទី ២៩ ខែកក្កដា ឆ្នាំ២០២៥ អ្នកសារព័ត៌មានយើង បានសាកសួរ តាមរយៈទូរសព្ទទៅលោក ជា ណាង ប្រធានអង្គភាពអគ្គិសនីបាត់ដំបង ដើម្បីចង់ដឹងអំពីបញ្ហាចរន្ត ដែលធ្វើទុក្ខបុកម្នេញទៅ លើស្រុកកំរៀងដែល ស្ថិតនៅក្បែរព្រំដែនកម្ពុជាថៃ ប៉ុន្តែក្រោយពីទទួល ខ្សែទូរសព្ទលោកបានឆ្លើយយ៉ាងខ្លីថា ” រឿងអញ្ចឹងម៉េចមិនសួរ ទៅតំណាងចែកចាយ ” ហើយលោកក៏បាន បិទទូរសព្ទតែម្ដង ដោយលោកមិនបានបកស្រាយ អំពីបញ្ហាដែលកំពុងប្រឈមនោះឡើយ ឬមួយក៏លោកមានបំណង ដោះដៃយករួចខ្លួន? អង្គភាពយើងខ្ញុំរង់ចាំបំភ្លឺឡើងវិញ ដរាបណាអង្គភាពអគ្គិសនី បាត់ដំបងឆ្លើយតប ៕ អត្ថបទ : សោ និយមរ័ត្ន
