(ភ្នំពេញ)៖ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួង មុខងារសាធារណៈ បានគូសរំលេចថា លទ្ធផលនៃសង្រ្គាម ឈ្លានពានដែលកម្ពុជា បានរងគ្រោះតាំងពីថ្ងៃទី២៤ ខែកក្កដា ឆ្នាំ២០២៥ បានបណ្ដាលឱ្យ ប៉ះពាល់ដល់ការស់នៅ របស់ប្រជាជនរាប់ម៉ឺននាក់ និងលំនៅដ្ឋានរបស់ប្រជាជន ស្លូតត្រង់ជាច្រើន ដែលធ្វើឱ្យភូមិស្ថានដែលធ្លាប់តែ អ៊ូអរប្រែក្លាយជាស្ងាត់ជ្រងំ ដូចភូមិដែលគេទុកចោល ដូចឃ្លាមួយដែលចាស់ៗ តែងពោលថា «មានផ្ទះអត់មនុស្សនៅ មានផ្លូវអត់មនុស្សដើរ»។
មន្ត្រីជាន់ខ្ពស់ខងលើ បានបន្តថា ការប៉ះទង្គិចនេះ មិនត្រឹមតែប៉ះពាល់ដល់ ការប្រកបរបរប្រចាំថ្ងៃរបស់ ពលរដ្ឋទេ ក៏ប៉ុន្តែបានជះឥទ្ធិពល ដល់វិស័យអប់រំរបស់កម្ពុជាដូចគ្នា ដោយសាលារៀនមួយចំនួន នៅតាមឃុំស្រុក នៅតំបន់ដែលទទួល រងនូវការវាយប្រហារត្រូវបាន ផ្អាកបណ្ដោះអាសន្ន ដែលធ្វើឱ្យរំខានយ៉ាងខ្លាំងដល់ សិស្សានុសិស្ស ទាំងអស់បើទោះបីជាការ ប៉ះទង្គិចគ្នាមានរយៈពេលត្រឹមតែ ៥ ថ្ងៃក៏ដោយ។
តាមរយៈបណ្តាញ សង្គមការងារនាព្រឹកថ្ងៃទី៣០ ខែកក្កដា ឆ្នាំ២០២៥នេះ ឯកឧត្តមឧបនាយករដ្ឋមន្ត្រី បានគូសរំលេចថា ទោះស្ថិតក្នុងកាលៈទេសៈណាក៏ដោយ ក្រោមការយកចិត្តទុកដាក់ របស់រាជរដ្ឋាភិបាលកម្ពុជា បានរៀបចំទីជម្រកសុវត្ថិភាព ស្បៀងអាហារ ដើម្បីការពារ និងគេចចេញពីការវាយប្រហារ ជូនដល់បងប្អូនប្រជាជនភៀសសឹក ចាកចេញពីភូមិដ្ឋាន ដ៏កក់ក្ដៅរបស់ខ្លួន ដែលបណ្ដាលមកពី សង្គ្រាមឈ្លានពាន។
ឯកឧត្តម បានបន្តថា ក្រោយពីទទួលអនុវត្តនូវបទ ឈប់បាញ់ដោយឥតលក្ខខណ្ឌ រវាងប្រទេសទាំងពីរ ពេលនេះបងប្អូនជនភៀស សឹកមួយចំនួនក៏បាននិង កំពុងធ្វើដំណើរវិលត្រឡប់ ទៅភូមិដ្ឋានរបស់ខ្លួន ដោយក្ដីសង្ឃឹម បន្ទាប់ពីមន្ត្រី សន្តិសុខបានវាយតម្លៃថា ស្ថានការណ៍ព្រំដែនមានសុវត្ថិភាព ឡើងវិញក្រោយការឯកភាព លើកិច្ចព្រមព្រៀង ឈប់បាញ់រវាងកម្ពុជា និងថៃ នេះគឺជាលទ្ធផលមួយ ដ៏ល្អសម្រាប់ប្រជាជន។ កម្ពុជាចង់បានតែសន្តិភាព ហើយយើងតែងតែប្រកាន់ ខ្ជាប់នូវជំហរដោះស្រាយ បញ្ហារដោយសន្តិវិធី៕
