លោកជំទាវ ចម និម្មល បញ្ជាក់ពីការប្តេជ្ញាចិត្ត របស់ក្រសួងពាណិជ្ជកម្ម ក្នុងការបន្តសម្របសម្រួល និងគាំទ្រដល់ធុរកិច្ច និងវិនិយោគិនសិង្ហបុរីនៅកម្ពុជា

(ភ្នំពេញ)៖ នាព្រឹកថ្ងៃអង្គារ ទី២៩ ខែកក្កដា ឆ្នាំ២០២៥ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអនុញ្ញាតជូនលោក Soo Wei Chieh នាយកប្រតិបត្តិផ្នែក ធុរកិច្ចអន្តរជាតិ និងជាប្រធាន គណៈប្រតិភូសហព័ន្ធ ធុរកិច្ចសិង្ហបុរី (Singapore Business Federation) និងសហការី ចូលជួប សម្តែងការគួរសម និងពិភាក្សាការងារ។

លោកជំទាវរដ្ឋមន្រ្តី បានសម្តែងការស្វាគមន៍ និងថ្លែងអំណរគុណជូន លោក Soo Wei Chieh និងគណៈប្រតិភូសហព័ន្ធធុរកិច្ចសឹង្ហបុរី ដែលបានចូលជួប ពិភាក្សាការងារនិងបង្ហាញ ពីចំណាប់អារម្មណ៍ លើការធ្វើធុរកិច្ច និងវិនិយោគនៅកម្ពុជា។

ជាមួយគ្នានោះ លោកជំទាវរដ្ឋមន្រ្តី​ បានជម្រាបជូនអំពីកិច្ច ខិតខំប្រឹងប្រែងរបស់ រាជរដ្ឋាភិបាល ជាពិសេសក្រសួងពាណិជ្ជកម្ម ក្នុងនាមជាសេនាធិកា របស់រាជរដ្ឋាភិបាល ក្នុងការបន្តធ្វើឱ្យប្រសើរ ទ្បើងនូវបរិយាកាសធុរកិច្ច និងវិនិយោគ កិច្ចសម្រួលពាណិជ្ជកម្ម ការធ្វើពិពិធកម្មសេដ្ឋកិច្ច បង្កើនភាពប្រកួតប្រជែង និងការបន្តពង្រឹងទីផ្សារដែលមានស្រាប់ ពង្រីកនិងបង្កើតទីផ្សារថ្មី។

ជាការឆ្លើយតប លោក Soo Wei Chieh ប្រធានគណៈប្រតិភូ សហព័ន្ធធុរកិច្ចសឹង្ហបុរី បានគោរពថ្លែងអំណរគុណ យ៉ាងជ្រាលជ្រៅជូន លោកជំទាវរដ្ឋមន្រ្តី ដែលបានផ្តល់ឱកាស ដ៏មានតម្លៃដើម្បីបាន ចូលជួបណែនាំ សមាសភាពគណៈប្រតិភូ និងជម្រាបជូនអំពី ទស្សនវិស័យនិងចំណាប់ អារម្មណ៍ក្នុងការមកធ្វើ ធុរកិច្ចនិងវិនិយោគនៅកម្ពុជា។

លោក Soo Wei Chieh បានវាយតម្លៃខ្ពស់លើកិច្ច ប្រឹងប្រែងរបស់រាជរដ្ឋាភិបាល ក្នុងការបន្តលើកស្ទួយតួនាទី ដ៏សំខាន់របស់វិស័យ ឯកជនក្នុងការរុញ ច្រានកំណើនសេដ្ឋកិច្ច ជាពិសេសការបន្តគាំទ្រ ដល់ការធ្វើធុរកិច្ចនិងវិនិយោគ ឱ្យកាន់តែប្រសើរទ្បើង តាមរយៈការផ្តល់ការលើក ទឹកចិត្តរបស់រាជរដ្ឋាភិបាល និងការដាក់ចេញនូវគំនិតផ្តួចផ្តើមថ្មីៗ ដទៃទៀត។

លោកជំទាវរដ្ឋមន្រ្តី បានបញ្ជាក់ជូនជាថ្មីនូវ ការប្តេជ្ញាចិត្តរបស់ ក្រសួងពាណិជ្ជកម្ម ក្នុងការបន្តសម្របសម្រួល  និងគាំទ្រដល់ធុរកិច្ច និងវិនិយោគិនសិង្ហបុរីនៅកម្ពុជា។