(ភ្នំពេញ)៖ នៅថ្ងៃទី២៩ ខែកក្កដា ឆ្នាំ២០២៥នេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានចេញសេចក្តី អំពាវនាវជាថ្មីម្តងទៀត ដល់សាធារណជន ជាពិសេសអ្នកប្រើប្រាស់ បណ្តាញសង្គម ក្រុម MMO និងអ្នកសារព័ត៌មានអនឡាញ ឱ្យប្រុងប្រយ័ត្ន និងបញ្ឈប់ការផ្សព្វផ្សាយព័ត៌មាន មិនច្បាស់លាស់ទាក់ទង នឹងសមរភូមិមុខ។
ឯកឧត្តមរដ្ឋមន្ត្រី បានសង្កត់ធ្ងន់ថា ចាប់តាំងពីម៉ោង ១២យប់ ថ្ងៃទី២៨ ខែកក្កដា ឆ្នាំ២០២៥ មក សមរភូមិមុខកំពុងស្ថិតក្នុង ការអនុវត្តបទឈប់បាញ់ ហើយព័ត៌មានដែលផ្សព្វផ្សាយ បន្តគ្នាដោយគ្មានប្រភពច្បាស់លាស់ គឺជាព័ត៌មានដែល មិនអាចយកជាការបានឡើយ។
ឯកឧត្តម នេត្រ ភក្ត្រា បានបញ្ជាក់យ៉ាងច្បាស់ថា ព័ត៌មានផ្លូវការពីសមរភូមិ គឺមានតែក្រសួង ការពារជាតិតែមួយគត់ ដែលនឹងធ្វើបច្ចុប្បន្ន ភាពជូនដោយផ្អែកលើការពិត ត្រឹមត្រូវ និងផ្ទៀងផ្ទាត់ច្បាស់លាស់។ ការផ្សព្វផ្សាយព័ត៌មានគ្មានប្រភពច្បាស់លាស់ ឬគ្រាន់តែឮតាមគ្នា គឺជាកំហុសឆ្គង និងបង្ហាញពីការ មិនទទួលខុសត្រូវ។
ជាចុងក្រោយ ឯកឧត្តមរដ្ឋមន្ត្រី បានអំពាវនាវដល់បងប្អូន ទាំងអស់ឱ្យរក្សាភាពអត់ធ្មត់ និងរង់ចាំទទួលព័ត៌មានផ្លូវការពី អ្នកនាំពាក្យរាជរដ្ឋាភិបាល អ្នកនាំពាក្យក្រសួងការពារជាតិ និងក្រសួងព័ត៌មាន។ ការធ្វើបែបនេះ គឺដើម្បីចៀសវាងការច្រឡោត ភ័យស្លន់ស្លោរ ឬប្រតិកម្មតបទៅនឹងព័ត៌មាន ដែលគ្មានប្រភពច្បាស់លាស់ និងព័ត៌មានគ្រាន់តែឮគេថា។
ឯកឧត្តមបានបន្ថែមថា ការរក្សាភាពអត់ធ្មត់ គោរពក្រមសីល ធម៌វិជ្ជាជីវៈឱ្យបានត្រឹមត្រូវ និងរួមគ្នាផ្តល់តែព័ត៌មានពិត ត្រឹមត្រូវ និងមានការទទួលខុសត្រូវខ្ពស់ គឺជាកាតព្វកិច្ចរបស់ទាំងអស់គ្នា ដើម្បីរក្សាបាននូវសណ្តាប់ធ្នាប់ និងផ្តល់នូវការពិតជូនដល់ប្រជាពលរដ្ឋ។ ការប្រយុទ្ធប្រឆាំងនឹង ព័ត៌មានក្លែងក្លាយ និងការផ្សព្វផ្សាយព័ត៌មានដែលគ្មាន ប្រភពច្បាស់លាស់ គឺជាការទទួលខុស ត្រូវរួមរបស់យើងទាំងអស់គ្នា៕
