(ភ្នំពេញ)៖ នាថ្ងៃទី២៧ ខែកក្កដា ឆ្នាំ២០២៥នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានអញ្ជើញដឹកនាំកិច្ចប្រជុំ ស្តីពីការអប់រំនៅតាមខេត្តជាប់ព្រំដែនថៃ និងការត្រៀមរៀបចំការប្រឡងសញ្ញាបត្រមធ្យមសិក្សាទុតិយភូមិ។
កិច្ចប្រជុំខាងលើ មានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា មន្ត្រីពាក់ព័ន្ធក្រោមឱវាទ និងមានការចូលរួមពីប្រធានមន្ទីរអប់រំ យុវជន និងកីឡាគ្រប់ ២៥រាជធានី-ខេត្ត តាមរយៈប្រព័ន្ធអនឡាញផងដែរ។
កិច្ចប្រជុំនេះ ត្រូវបានរៀបចំជាបន្ទាន់ ដើម្បីឆ្លើយតបទៅនឹងសភាព ការណ៍ជាក់ស្តែងនៃ បញ្ហាព្រំដែនកម្ពុជា-ថៃ ដោយមាន គោលបំណងដូចជា៖ ១. ការពិនិត្យរបាយការណ៍សង្ខេប នៃវិស័យអប់រំតាមបណ្តាល ខេត្តកំពុងមានបញ្ហាផ្ទុះអាវុធ ២. ការពិនិត្យ ថ្លឹងថ្លែងលើស្ថានភាពជាក់ស្តែង រួមទាំងការត្រៀមរៀបចំការប្រឡងសញ្ញាបត្រមធ្យមសិក្សាទុតិយភូមិ ៣. ការពិនិត្យពីស្ថានភាពជាក់ស្តែង របស់សិស្សដែលកំពុងសិក្សា និងរស់នៅក្នុងប្រទេសថៃ៕
