(គូឡាឡាំពួ)៖ រដ្ឋមន្ត្រីការបរទេសម៉ាឡេស៊ី លោក Mohamad Hasan បានប្រកាសឱ្យដឹងថា កម្ពុជា និងថៃ បានយល់ព្រមឱ្យម៉ាឡេស៊ី ធ្វើជាអ្នកសម្របសម្រួល ក្នុងកិច្ចប្រឹងប្រែងដោះស្រាយ ជម្លោះព្រំដែនរវាងប្រទេសទាំង២។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។
លោក Mohamad Hasan បានប្រាប់សារព័ត៌មានម៉ាឡេស៊ី Bernama នៅល្ងាចថ្ងៃអាទិត្យ ទី២៧ ខែកក្កដាថា នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីស្ដីទីថៃ លោក Phumtham Wechayachai ត្រូវបានរំពឹងថា នឹងធ្វើដំណើរទៅកាន់ម៉ាឡេស៊ី នៅល្ងាចថ្ងៃចន្ទ ទី២៨ ខែកក្កដា ឆ្នាំ២០២៥។
«ភាគីទាំង២ មានទំនុកចិត្តយ៉ាង ពេញលេញលើម៉ាឡេស៊ី ហើយបានស្នើឱ្យ ខ្ញុំធ្វើជាអ្នកសម្របសម្រួល»។ នេះជាការគូសបញ្ជាក់របស់លោក Mohamad ដោយបន្ថែមថា លោកបានពិភាក្សារួចហើយជាមួយសមភាគីកម្ពុជា និងថៃរបស់លោក ខណៈភាគីជម្លោះទាំង២ ឯកភាពថានឹងមិនមាន ប្រទេសដទៃផ្សេងចូល រួមក្នុងបញ្ហានេះទេ។
កិច្ចចរចាដែលគ្រោង នឹងធ្វើឡើងនៅម៉ាឡេស៊ី កើតមានឡើងបន្ទាប់ ពីនាយករដ្ឋមន្ត្រីម៉ាឡេស៊ី លោក Anwar Ibrahim ដែលជាប្រធានប្ដូរវេនអាស៊ាន បានស្នើឱ្យមាន បទឈប់បាញ់មួយកាលពីថ្ងៃសុក្រ ហើយប្រធានាធិបតីអាមេរិក លោក ដូណាល់ ត្រាំ បាននិយាយកាលពី ថ្ងៃសៅរ៍ថាមេដឹកនាំកម្ពុជា និងថៃ បានឯកភាពគ្នាថានឹងជួប ចរចាគ្នាលើបទឈប់បាញ់ឆាប់ៗ៕
