ខេត្តស្ទឹងត្រែង៖ នៅព្រឹកថ្ងៃទី៤ ខែវិច្ឆិកា ឆ្នាំ២០២៦ ឯកឧត្តម សរ សុពុត្រា អភិបាលខេត្តស្ទឹងត្រែង និងឯកឧត្តម ឈាង ឡាក់ ប្រធានក្រុមប្រឹក្សាខេត្ត បានអញ្ជើញជាអធិបតីក្នុងពិធីសំណេះសំណាល និងជូនដំណើរយុវជនស្ម័គ្រចិត្តចំនួន ១១០នាក់ ឆ្ពោះទៅកាន់សាលាហ្វឹកហ្វឺនកងទ័ព ដើម្បីទទួលការបណ្តុះបណ្តាលនិងហ្វឹកហ្វឺនជំនាញយោធា មុនចូលបំពេញភារកិច្ចការពារជាតិ។
ពិធីនេះបានប្រព្រឹត្តទៅនៅបរិវេណមុខសាលាខេត្តស្ទឹងត្រែង ដោយមានការចូលរួមពីមន្ត្រីរាជការ កងកម្លាំងប្រដាប់អាវុធ និងមាតាបិតា អាណាព្យាបាលយ៉ាងច្រើនកុះករផងដែរ។
ឯកឧត្តម សរ សុពុត្រា អភិបាលខេតុ្តស្ទឹងត្រែង បានសម្តែងការកោតសរសើរ និងវាយតម្លៃខ្ពស់ចំពោះស្មារតីស្នេហាជាតិដ៏មុះមុតរបស់យុវជនទាំងអស់ ដែលបានស្ម័គ្រចិត្តចូលរួមបម្រើជាតិមាតុភូមិ និងបំពេញកាតព្វកិច្ចក្នុងការការពារជាតិ។
ឯកឧត្តមអភិបាលខេត្តបានបញ្ជាក់ថា ការបំពេញកាតព្វកិច្ចយោធា គឺជាកាតព្វកិច្ចដ៏ឧត្តុង្គឧត្តម និងជាកិត្តិយសដ៏ខ្ពង់ខ្ពស់មួយរបស់ពលរដ្ឋខ្មែរ ស្របតាមច្បាប់ និងរដ្ឋធម្មនុញ្ញនៃព្រះរាជាណាចក្រកម្ពុជា។
ឯកឧត្តមអភិបាលខេត្តបានបន្តថា ការចូលរួមបំពេញកាតព្វកិច្ចយោធា មិនត្រឹមតែជាការចូលរួមចំណែកក្នុងការការពារឯករាជ្យ អធិបតេយ្យភាព និងបូរណភាពទឹកដីប៉ុណ្ណោះទេ ប៉ុន្តែថែមទាំងជាឱកាសដ៏មានតម្លៃសម្រាប់យុវជនក្នុងការរៀនសូត្រ និងលត់ដំខ្លួនឯង ឱ្យមានភាពរឹងមាំទាំងកាយសម្បទា ស្មារតី សីលធម៌ វិន័យ សាមគ្គីភាព និងសមត្ថភាពក្នុងការទទួលខុសត្រូវចំពោះភារកិច្ច។
ឯកឧត្តម សរ សុពុត្រា បានផ្តាំផ្ញើដល់យុវជនស្ម័គ្រចិត្តទាំង ១១០នាក់ ឱ្យខិតខំក្រេបយកចំណេះដឹង បទពិសោធន៍ និងជំនាញបច្ចេកទេសយោធាឱ្យបានល្អប្រសើរ ត្រូវគោរពវិន័យកងទ័ព ស្រឡាញ់សាមគ្គីភាព រួបរួមគ្នាជាធ្លុងមួយ និងយកចិត្តទុកដាក់ថែរក្សាសុខភាព ដើម្បីអភិវឌ្ឍខ្លួនឱ្យក្លាយជាកម្លាំងយុវជន ប្រកបដោយសមត្ថភាព សីលធម៌ និងភាពរឹងមាំ ជាកម្លាំងបន្តវេនដ៏មានសារៈសំខាន់សម្រាប់ជាតិមាតុភូមិ។
ពិធីជូនដំណើរនេះ បានបញ្ចប់ទៅក្នុងបរិយាកាសដ៏កក់ក្តៅ និងពោរពេញដោយមោទនភាពពីសំណាក់អាជ្ញាធរ កងកម្លាំង និងក្រុមគ្រួសារ ដែលបានផ្ញើក្តីសង្ឃឹម និងការលើកទឹកចិត្តដល់យុវជនទាំង ១១០នាក់ ឱ្យបំពេញភារកិច្ចរបស់ខ្លួនប្រកបដោយភាពស្មោះត្រង់ វិន័យ និងការទទួលខុសត្រូវខ្ពស់ចំពោះជាតិមាតុភូមិ៕SamNeang
