ខេត្តក្រចេះ៖ ឈើជ្រុងអារដែលមានប្រវែង វែង និងមានមុខកាត់ធំៗ ១៣កំណាត់ ស្មើនឹង ៨,៧២៥ ម៉ែត្រគូបត្រីគុណ ដែលឈ្មួញបានធ្វើសកម្មភាពដឹកជញ្ជូនធ្វើជំនួញយ៉ាងអាណាធិបតេយ្យ នៅយប់ថ្ងៃទី២៨តុលា២០២៥ បានរងការបង្ក្រាប និងរឹបអូសពីកម្លាំងសមត្ថកិច្ចខេត្តក្រចេះនោះហើយ នៅព្រឹកថ្ងៃទី២៩ ខែវិច្ឆិកា ឆ្នាំ២០២៥ ស្ថិតក្នុងឃុំគោលាប់ ស្រុកចិត្របុរី ។
អភិបាលខេត្តក្រចេះ លោក វ៉ា ថន ត្រូវបានគេដកស្រង់សម្តី នៅថ្ងៃពុធ ទី២៩តុលានេះថា មន្រ្តីអាជ្ញាធរមានសមត្ថកិច្ច បានបង្រ្កាបការដឹកជញ្ជូនឈើខុសច្បាប់ចំនួន១៣ដុំធំៗ ស្មើនឹង ៨,៧២៥ ម៉ែត្រគូប «ទាន់ពេលវេលា» ក្រោយពីអ្នកសារព័ត៌មានបានធ្វើការផ្សព្វផ្សាយ។
លោក វ៉ា ថន បានបញ្ជាក់ប្រាប់សារធាណជនថា «ឈើនេះជាឈើរកា (ក្រៅលំដាប់ថ្នាក់) ដែលអាចយកមកប្រើប្រាស់ក្នុងការងារសំណង់ ដូចជាក្តាមពុម្ព ចំនួន ១៣ ដុំ ស្មើនឹង ៨,៧២៥ ម៉ែត្រគួប ដែលដឹកចេញស្រុកអូរគ្រៀងសែនជ័យ ឆ្ពោះមកកាន់ខេត្តក្រចេះ ហើយត្រូវបានជនល្មើសទំលាក់ចោល នៅឃុំគោលាប់ ស្រុកចិត្របុរី មុនពេលសមត្ថកិច្ចទៅដល់ និងជនល្មើសបានធ្វើការរត់គេចខ្លួន»។
លោក វ៉ា ថន អភិបាលខេត្តក្រចេះ បានអះអាងថា នាពេលបច្ចុប្បន្ននេះ កងកម្លាំងសមត្ថកិច្ចកំពុងស្រាវជ្រាវរកជនល្មើស ដើម្បីយកមកផ្តន្ទាទោសតាមច្បាប់។
គួរបញ្ជាក់ថា នៅម៉ោងជាង ៦កន្លះយប់ ថ្ងៃទី២៨តុលា២០២៥ គោយន្តដឹកជញ្ជូនឈើជាច្រើនគ្រឿង ត្រូវគេឃើញបានបើកដង្ហែរគ្នានៅលើដងផ្លូវជាតិ៧ (ផ្លូវអាស៊ាន) ចេញពីស្រុកអូរគ្រៀងសែនជ័យ ឆ្ពោះទៅកាន់ក្រុងក្រចេះ។
នៅក្នុងសកម្មភាពដឹកជញ្ជូនឈើល្មើសច្បាប់នោះ មិនត្រូវគេឃើញ កម្លាំងសមត្ថកិច្ចដែលមានស្នាក់ការនៅតាមដងផ្លូវ ក្នុងតួនាទីទប់ស្កាត់ និងបង្ក្រាបបទល្មើសធនធានធម្មជាតិ ចុះទប់ស្កាត់ បង្ក្រាបការដឹកជញ្ជូនឈើពីក្រុមឈ្មួញទាំងនោះឡើយ។ សកម្មភាពល្មើសច្បាប់នោះ ត្រូវគេរិះគន់សមត្ថកិច្ចជំនាញថា ហាក់កំពុងដេកលក់ និងមិនបានអនុវត្តច្បាប់ព្រៃឈើឲ្យបានតឹងរឹង តាមបទបញ្ជារបស់ប្រមុខដឹកនាំរាជរដ្ឋាភិបាល ក៏ដូចគណៈកម្មាធិការជាតិទប់ស្កាត់ និងបង្ក្រាបបទល្មើសធនធានធម្មជាតិ នោះឡើយ៕SAMNEANG
