ខេត្តស្ទឹងត្រែង៖ រថយន្តសណ្តោងរ៉ឺម៉កខ្នាតយក្សដឹករ៉ែធ្យូងថ្មមួយគ្រឿង បានក្រឡាប់ និងចាក់រ៉ែធ្យូងថ្មចោលទៅលើដីទាំងព្រឹកព្រលឹម តែមិនបណ្តាលឲ្យមានមនុស្សរងគ្រោះថ្នាក់ធ្ងន់ធ្ងរនោះទេ ដែលការក្រឡាប់នោះ គេសង្ស័យថា ទំនងជារថយន្តនោះអកស៊ើនឹងទីតាំងដាក់គោលដៅត្រួតពិនិត្យប័ណ្ណបង់ភាស៊ីរថយន្ត របស់ក្រុមអ្នកប្រមូលភាស៊ីខេត្តស្ទឹងត្រែង ក្នុងហេតុការណ៍ដែលបានកើតឡើង នៅម៉ោងប្រមាណជា ៦ និង ១៥នាទីព្រឹក ថ្ងៃទី១៣ ខែតុលា ឆ្នាំ២០២៥ នៅលើកំណាត់ផ្លូវជាតិលេខ៩ ស្ថិតក្នុងសង្កាត់ព្រះបាទ ក្រុងស្ទឹងត្រែង ។
សាក្សីនៅកន្លែងកើតហេតុបានឲ្យអ្នកសារព័ត៌មានដឹងថា ក្នុងពេលកើត ហេតុនាវេលាម៉ោងខាងលើនោះ មានរថយន្តមួយខ្សែប្រមាណ ៤ ទៅ ៥គ្រឿង បានបើកបរបន្តកន្ទុយគ្នា ក៏ស្រាប់តែគេឃើញរថយន្តដែលបើកក្រោយគេបង្អស់ បានបានជ្រុលចង្កូតទៅបុកសាជី (កន្លែងត្រួតពិនិត្យប័ណ្ណបង់ភាស៊ី) រួចបានរេចង្កូតនៅលើទ្រូងផ្លូវ ក្រឡាប់នៅលើស្នាមភ្លោះប្រឡាយទឹក នៅប្របនឹងដងផ្លូវជាតិលេខ៩ នោះតែម្តងទៅ។
ជុំវិញហេតុការណ៍ក្រឡាប់រថយន្តដឹកជញ្ជូនរ៉ែធ្យូងថ្មខាងលើនេះ អ្នកបើកបររថយន្ត លោក ហ៊ីង កក្កដា បានអះអាងថា ការឡាប់រថយន្តនេះ ដោយសារគេចពីសាជី ដែលអ្នកទាភាស៊ី បានដាក់នៅលើទ្រូងផ្លូវ ត្រង់ចំណុចត្រួតពិនិត្យបប័ណ្ណបង់ភាស៊ី ទើបរេចង្កូតក្រឡាប់នៅក្នុងពេលនោះ ហើយរថយន្តនេះបានដឹករ៉ែធ្យូងថ្ម ចេញពីខេត្តស្ទឹងត្រែង ឆ្ពោះទៅខេត្តឧត្តរមានជ័យ។
លោក ហ៊ីង កក្កដា បានបញ្ជាក់ថា រថយន្តនេះបានផ្ទុករ៉ែធ្យូងថ្មក្នុងទម្ងន់ ១៩តោន ដោយនៅក្នុងបញ្ជីបុងដឹកជញ្ជូន ចេញដោយក្រុមហ៊ុនមានចំនួន ២៩.៤២តោន ហើយកម្រៃឈ្នួលក្នុងមួយតោន ២៥ដុល្លារ ដោយដឹកចេញពីឃុំតាឡាត ស្រុកសេសាន ខេត្តស្ទឹងត្រែង របស់ក្រុមហ៊ុន ហ្គ្រីន វូត ឌីវេឡុបមេន ខមភេនី ទទួលបានអាជ្ញាប័ណ្ណឧស្សាហកម្មអាជីវកម្មធនធានរ៉ែ (សម្រាប់អាជីវកម្មរ៉ែធ្យូងថ្ម) ពីក្រសួងរ៉ែ និងថាមពល លេខ ០១៤៩ រថ.ឧអធរ.អប ថ្ងៃទី២០ខែតុលាឆ្នាំ២០២១។យោងអាជ្ញាបណ្ណរបស់ក្រសួងរ៉ែ និងថាមពល បានសម្រេច៖ ១-ផ្តល់អាជ្ញាបណ្ណឧស្សាហកម្មអាជីវកម្មធនធានរ៉ែ លើទំហំផ្ទៃដី ២០,៧៥ (ម្ភៃក្បៀសចិតសិនប្រាំ) ក្នុងភូមិសាស្ត្រ តំបន់តាឡាត ស្រុកសេសាន ខេត្តស្ទឹងត្រែង ឱ្យក្រុមហ៊ុន ហ្គ្រីន វូត ឌីវេឡុបមេន ខមភេនី (ក្រុមហ៊ុន Green Wood Development Company Ltd.) ដែលមានអាសយដ្ឋានផ្ទះលេខ ៩៤ ផ្លូវ២៧១ សង្កាត់ទំនប់ទឹក ខណ្ឌចំការមន រាជធានីភ្នំពេញ ,២-ក្រុមហ៊ុន ហ្គ្រីន វុត ឌីវេឡុបមេន ខមភេនី (ក្រុមហ៊ុន Green Wood Development Company Ltd.) ត្រូវដំណើរការប្រតិបត្តិការធនធានរ៉ែ ក្នុងដែនអាជ្ញាបណ្ណទំហំ ៨,៨១ (ប្រាំបីក្បៀសប៉ែតសិបមួយ) គីឡូម៉ែត្រការ៉េ ដូចមាននិយាមកាកំណត់ក្នុងផែនទី នៃអាជ្ញាបណ្ណនេះ និងស្របតាមប្រកាសលេខ.០១៤៩ រថ.ឧអធរ.ប្រក ស្តីពីលក្ខខន្ធនៃអាជ្ញាបណ្ណ ឧស្សាហកម្មអាជីវកម្មធនធានរ៉ែ (សម្រាប់អាជីវកម្មរ៉ែធ្យូងថ្ម) ,៣-អាជ្ញាបណ្ណនេះមានសុពលភាព ១៣ (ដប់បី) ឆ្នាំ ចាប់ពីថ្ងៃទី ២០ខែតុលាឆ្នាំ២០២១ រហូតដល់ថ្ងៃទី២០ ខែតុលា ឆ្នាំ២០៣៤ ,៤-នាយកខុទ្ទកាល័យ អគ្គនាយកធនធានរ៉ែ អគ្គនាយកកិច្ចការ អគ្គនាយកធនធានរ៉ែ អគ្គនាយកកិច្ចការទូទៅ អគ្គាធិការ ប្រធានមន្ទីររ៉ែ និងថាមពលខេត្តស្ទឹងត្រែង និងប្រធានក្រុមហ៊ុន ហ្គ្រីន វូត ឌីវេឡុបមេន ខមភេនី (ក្រុមហ៊ុន Green Wood Development Company Ltd.) ត្រូវ អនុវត្តឲ្យមានប្រសិទ្ធភាពតាមភារកិច្ចរៀងៗខ្លួន។
ដោយឡែក លោកស្រី ញ៉ែម សុម៉ាលី ប្រធានមន្ទីររ៉ែ និងថាមពលខេត្តស្ទឹងត្រែង លោកស្រីធ្លាប់ប្រាប់អ្នកសារព័ត៌មានថា រ៉ែធ្យូងថ្មី ស្ថិតរបស់ក្រុមហ៊ុនហ្គ្រីន វូត ឌីវេឡុបមេន ខមភេនី នៅចំណុចទីតាំងខាងលើ ដឹកជញ្ជូនទៅខេត្តបាត់ដំបង ហើយនៅរាល់ការដឹកចេញមានមន្រ្តីមន្ទីរ និងមន្រ្តីក្រសួងប្រចាំការ និងកត់ត្រាការដឹកចេញ និងបរិមាណត្រឹមត្រូវ។ លោកស្រីបញ្ជាក់ថា ចាប់ពីខែមករា ដល់ខែកក្កដាឆ្នាំ២០២៤ ក្រុមហ៊ុនយករ៉ែបាន ១៨ពាន់ ៧៧៨តោន។ ប៉ុន្តែ នៅថ្ងៃទី១៣តុលា២០២៥នេះ លោកស្រី មិនទាន់បានបង្ហាញទិន្នន័យផ្លូវការសម្រាប់ឆ្នាំ២០២៥ នេះទេ ដោយសារលោកស្រី ជាប់បេសកកម្មនៅឯភ្នំពេញ។SAMNEANG
