(ភ្នំពេញ)៖ សម្តេចមហា រដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាណាចក្រកម្ពុជា នៅរសៀលថ្ងៃទី១៧ ខែកញ្ញា ឆ្នាំ២០២៥ បានអញ្ជើញថ្លែង សុន្ទរកថាគន្លឹះក្នុង វេទិកាអ្នកដឹកនាំ នយោបាយស្ត្រី អាយប៉ាលើកទី២ ដែលជាការជួប ប្រជុំដ៏សំខាន់មួយ នៃមហាសន្និបាត អន្តរសភាអាស៊ាន (អាយប៉ា/AIPA) រៀបចំឡើងសម្រាប់ ការជួបជុំគ្នារបស់ថ្នាក់ ដឹកនាំនិងសមាជិក សភាអាស៊ាន និងសភាដៃគូ អាយប៉ាជាស្រ្តី ផ្លាស់ប្តូរទស្សនៈ គ្នានៅក្នុងការលើក កម្ពស់តួនាទីស្រ្តី នៅក្នុងការចូលរួម ដោះស្រាយបញ្ហា នានាជូនប្រជាពលរដ្ឋ។ វេទិកាអ្នកដឹកនាំ នយោបាយស្ត្រីអាយប៉ា នៅឆ្នាំនេះ បានប្រារព្ធធ្វើឡើង ក្រោមប្រធានបទ “ភាពជាអ្នកដឹកនាំ របស់ស្ត្រីសម្រាប់ ការត្រៀមអភិបាល កិច្ចនាពេលអនាគត៖ ការស្វែងរកការផ្លាស់ ប្តូរក្នុងយុគសម័យឌីជីថល និងនិរន្តរភាព។
សម្តេចរដ្ឋសភាធិបតី បានគូសបញ្ជាក់ថា ប្រធានបទនេះ ពិតជាមានសារៈសំខាន់ និងសមស្របបំផុត ទៅនឹងបរិបទបច្ចុប្បន្ន។
សម្តេចប្រធានរដ្ឋសភា នៃព្រះរាជាណាចក្រកម្ពុជា បានមានប្រសាសន៍បន្តថា រចនាសម្ព័ន្ធអភិបាលកិច្ចសកល តំបន់ និងថ្នាក់ជាតិ កំពុងស្ថិតនៅក្នុង ភាពតានតឹងមួយដែល មិនធ្លាប់មានពីមុនមក ដោយសារវិបត្តិជាច្រើន រួមមានការប្រកួត ប្រជែងភូមិសាស្ត្រនយោបាយ ការថមថយនៃសេដ្ឋកិច្ច ការប្រែប្រួលអាកាស ធាតុ ការផ្លាស់ប្តូរបច្ចេកវិទ្យា និងការបែកបាក់សង្គម ជាដើម។ សម្ពាធទាំងនេះជា ឧបសគ្គដល់ស្ថាប័ន ដែលកំពុងដំណើរការ ដើម្បីរក្សាបាន នូវភាពសំខាន់ ប្រសិទ្ធភាព និងភាពធន់របស់ខ្លួន។ ដើម្បីបន្តនិរន្តរភាព និងរីកចម្រើនទៅ មុខក្នុងបរិយាកាស ប្រែប្រួលបែបនេះ ប្រព័ន្ធអភិបាលកិច្ចមិន ត្រឹមតែត្រូវសម្រប ខ្លួនប៉ុណ្ណោះទេ ថែមទាំងត្រូវមាន ការច្នៃប្រឌិតខ្ពស់ ជាបន្តបន្ទាប់ ដោយត្រូវសិក្សាពី ចំណុចខ្វះខាតកន្លងមក និងត្រូវប្រមើល មើលពីបញ្ហា និង ឧបសគ្គ នាពេលអនាគត។
សម្តេចបានកត់សម្គាល់ថា “ស្ថិតក្នុងកាលៈទេសៈបែបនេះ យើងត្រូវការដំណោះស្រាយរួម និងមាន បរិយាបន្ន ហើយស្ត្រីពិតជា ផ្នែកមួយនៃដំណោះស្រាយ។ ភាពជាអ្នកដឹកនាំរបស់ ស្ត្រីគឺពិតជាសំខាន់។ ទោះជាយ៉ាង ណាក៏ដោយ ស្ត្រី និងក្មេងស្រីនៅជុំវិញ ពិភពលោកកំពុង ប្រឈមមុខនឹងសម្ពាធ និងបញ្ហាប្រឈម នានាកាន់តែខ្លាំង ឡើងដែលកើតចេញពីវិសមភាព និងការរើសអើង នៃរចនាសម្ព័ន្ធ”។ នេះជាការបញ្ជាក់ របស់សម្តេចប្រធានរដ្ឋសភា។
សម្តេចប្រធាន រដ្ឋសភាកម្ពុជា បានលើកឡើងបន្តទៀតថា នៅក្នុងតំបន់អាស៊ីអាគ្នេយ៍ ការរើសអើងយេនឌ័រ នៅតែជាកង្វល់គួរ ឱ្យព្រួយបារម្ភមួយ ជាមួយនឹងផល វិបាកផ្នែកសេដ្ឋកិច្ច សង្គមយ៉ាងច្រើន សន្ធឹកសន្ធាប់។ យោងតាមការសិក្សានានា ការខាតបង់ផ្នែក សេដ្ឋកិច្ចត្រូវបាន ប៉ាន់ប្រមាណថា អាចនឹងមានប្រហែល ២០០ ពាន់លានដុល្លារនៅឆ្នាំ ២០៣០។ កិច្ចខិតខំប្រឹងប្រែង អភិវឌ្ឍន៍សេដ្ឋកិច្ច និងការកាត់បន្ថយ ភាពក្រីក្រត្រូវ បានរារាំងដោយ កង្វះការចូលរួម ពេញលេញរបស់ស្រ្តី។ ដូច្នេះ ការពង្រីកតួនាទីរបស់ ស្ត្រីក្នុងការសម្រេច ចិត្តលើគ្រប់វិស័យគឺ ពិតជាចាំបាច់ សម្រាប់ការបង្កើត ដំណោះស្រាយរួម។ និយាយដោយខ្លីគឺថា បរិយាបន្ននាំឱ្យសម្រេច បានលទ្ធផលល្អប្រសើរ៕
