ឯកឧត្តម ឧបនាយករដ្ឋមន្ត្រី ប្រាក់ សុខុន កោតសរសើរតំណាង អង្គការយូណេស្កូ ចំពោះកិច្ចខិតខំ ប្រឹងប្រែង និងការចូលរួមចំណែក ក្នុងការជំរុញអាទិភាព សម្រាប់ការអភិវឌ្ឍ របស់កម្ពុជា

(ភ្នំពេញ)៖ នៅព្រឹកថ្ងៃទី១៧ ខែកញ្ញា ឆ្នាំ២០២៥ នៅទីស្តីការក្រសួង ឯកឧត្តមឧបនាយក រដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការ អន្តរជាតិ បានទទួលជំនួប សម្ដែងការគួរសម និងជម្រាបលារបស់ ឯកឧត្តម Sardar Umar Alam តំណាងអង្គការយូណេស្កូ ប្រចាំព្រះរាជាណា ចក្រកម្ពុជា ក្នុងឱកាសដែលឯកឧត្ដម បានបញ្ចប់បេសក កម្មការងារនៅកម្ពុជា។

នៅក្នុងជំនួប ឯកឧត្តមឧបនាយករដ្ឋមន្ត្រី បានកោតសរសើរ ឯកឧត្ដម Sardar Umar Alam ចំពោះកិច្ចខិតខំប្រឹងប្រែងរបស់ឯកឧត្ដម និងការចូលរួមចំណែក ដ៏មានតម្លៃរបស់ អង្គការយូណេស្កូ ក្នុងការជំរុញអាទិភាព សម្រាប់ការអភិវឌ្ឍរបស់កម្ពុជា ជាពិសេសលើវិស័យអប់រំ វប្បធម៌ និងការអភិរក្ស សម្បត្តិបេតិកភណ្ឌ។

ឯកឧត្ដម Sardar Umar Alam បានថ្លែងអំណរគុណ យ៉ាងជ្រាលជ្រៅចំពោះ រាជរដ្ឋាភិបាលកម្ពុជា ដែលបានផ្ដល់កិច្ច សហការយ៉ាងជិតស្និទ្ធ និងប្រកបដោយផ្លែផ្កា ក្នុងអំឡុងបេសកកម្ម ការងាររបស់ឯកឧត្ដម៕