(ភ្នំពេញ)៖ នៅព្រឹកថ្ងៃអង្គារ ១០កើត ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២ ខែកញ្ញា គ.ស.២០២៥, និយ័តករ មូលបត្រកម្ពុជា (ន.ម.ក.) បានរៀបចំពិធីចុះ ហត្ថលេខាលើកិច្ច ព្រមព្រៀងស្ដីពី “ការអភិវឌ្ឍប្រព័ន្ធ ជួញដូរភាគហ៊ុន តាមម៉ាជីន” រវាង ន.ម.ក. ផ្សារមូលបត្រកម្ពុជា (ផមក) និងក្រុមហ៊ុន មូលបត្រចំនួន ៩ រួមមាន៖ ក្រុមហ៊ុនមូលបត្រ អ អេច ប៊ី (ខេមបូឌា) ម.ក, ក្រុមហ៊ុនមូលបត្រ កាណាឌីយ៉ា ឯ.ក., ក្រុមហ៊ុនមូលបត្រ អេស៊ីលីដា ម.ក, ក្រុមហ៊ុនមូលបត្រ កម្ពុ ម.ក., ក្រុមហ៊ុនមូលបត្រ រ៉ូយ៉ាល់គ្រុប ម.ក, ក្រុមហ៊ុនមូលបត្រ យាន់តា (ខេមបូឌា) ម.ក, ក្រុមហ៊ុនមូលបត្រ អេសប៊ីអាយ រ៉ូយ៉ាល់ ម.ក., ក្រុមហ៊ុនមូលបត្រ ហ្គោលដេន ហ្វ័រឈូន ម.ក និងក្រុមហ៊ុន ខេមបូឌា ស៊ីឃ្យួរឹធី ម.ក ក្រោមអធិបតីភាព ដ៏ខ្ពង់ខ្ពស់របស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជា អគ្គនាយកនៃ ន.ម.ក. និងឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជា អគ្គនាយកនៃ ផមក ព្រមទាំងមានការ អញ្ជើញចូលរួមពីលោក ប្រធានក្រុមប្រឹក្សា ភិបាល/លោក អភិបាល/លោកអគ្គនាយក/ លោកនាយកប្រតិបត្តិ នៃក្រុមហ៊ុនមូលបត្រ ទាំងអស់។
កិច្ចព្រមព្រៀងនេះ មានគោលបំណង បង្កើននូវកិច្ចសហ ប្រតិបត្តិការរវាង ភាគីពាក់ព័ន្ធ ដូចជា ន.ម.ក. ផមក និងក្រុមហ៊ុនមូល បត្រទំាងអស់ ដើម្បីរួមគ្នាអភិវឌ្ឍន៍ ប្រព័ន្ធប្រតិបត្តិការ ជួញដូរភាគហ៊ុន តាមម៉ាជីន (Share Margin Trading System) ក្នុងគោលដៅដើម្បី បង្កើនសន្ទនីយភាពទីផ្សារ ជំរុញសកម្មភាពជួញដូរ និងធ្វើទំនើបកម្ម ទីផ្សារមូលធនកម្ពុជា ដើម្បីចូលរួមជំរុញ កំណើនសេដ្ឋកិច្ច និងអភិវឌ្ឍន៍វិស័យហិរញ្ញវត្ថុនៃ ព្រះរាជាណាចក្រកម្ពុជា។
កម្មវិធីចុះហត្ថលេខា កិច្ចព្រមព្រៀងនេះ រៀបចំឡើងនៅអគារ ទីស្ដីការអាជ្ញាធរសេវា ហិរញ្ញវត្ថុមិនមែនធនាគារ ដែលមានការចូលរួម ផ្ទាល់ពីថ្នាក់ដឹកនាំ-មន្ត្រីនៃ ន.ម.ក., ថ្នាក់ដឹកនាំ-បុគ្គលិកនៃ ផមក និងក្រុមហ៊ុនមូលបត្រ ដោយមាន អ្នកចូលរួមទាំង អស់ប្រមាណជិត ៥០ នាក់ ៕
