(ខេត្តកំពង់ចាម)៖ នៅព្រឹកថ្ងៃទី២ ខែកញ្ញា ឆ្នាំ២០២៥នេះឯកឧត្តម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានដឹកនាំក្រុមការងារ និងមន្ទីរអង្គភាពជំនាញ អញ្ជើញចុះពិនិត្យ លក្ខណៈបច្ចេកទេស ប្រព័ន្ធលូរំដោះទឹកភ្លៀង និងគម្រោងជួសជុល កែលម្អសួនច្បារ ការដាំដើមឈើ ដើមផ្កាលម្អ នៅតាមបណ្តោយផ្លូវភ្លោះ ស.ស.យ.ក ខេត្ត ស្ថិតក្នុងភូមិតាណេង សង្កាត់សំបួរមាស ក្រុងកំពង់ចាម។
បន្ទាប់ពីអញ្ជើញ ចុះពិនិត្យ និងសិក្សាលទ្ធភាព ដោយផ្ទាល់ ឯកឧត្តមអភិបាលខេត្ត ក៏បានចាត់ឱ្យមន្ទីរ សាធារណការ និងដឹកជញ្ជូន មន្ទីរបរិស្ថាន និងអាជ្ញាធរក្រុង សហការអនុវត្ត ការងារខាងលើនេះ ចាប់ពីថ្ងៃនេះតទៅ សំដៅធ្វើយ៉ាងណា ពង្រីកសោភណភាព ក្រុងឱ្យកាន់តែមាន ភាពស្រស់បំព្រង គួរជាទីទាក់ទាញ ដល់ភ្ញៀវទេសចរណ៍ ជាតិ-អន្តរជាតិ មកទស្សនាកំសាន្ត និងការត្រៀមខ្លួនចូល រួមប្រឡងប្រណាំង ជ័យលាភីទីក្រុងស្អាត ក៏ដូចជាការរក្សាឱ្យ បាននូវខ្សែក្រវាត់ជ័យលាភី “ទីក្រុងស្អាត រំដួល៣ទង” ដែលយើងធ្លាប់ ទទួលបាន២ អាណត្តិជាប់ៗគ្នា៕
