(ខេត្តកំពង់ធំ)៖ សមត្ថកិច្ចនគរបាល ប្រឆាំងបទល្មើសសេដ្ឋកិច្ច នៃស្នងការដ្ឋាន នគរបាលខេត្តកំពង់ធំ កាលពីយប់ថ្ងៃទី៣១ សីហា ឈានចូលថ្ងៃទី១ កញ្ញា ២០២៥ បានឃាត់
រថយន្តខ្នាតយក្ស ដឹកអង្កដំណើប ៣គ្រឿង ដែលគេអះអាងថា នាំចូលពីប្រទេសថៃ តាមច្រកកំពង់ស្រឡៅ ខេត្តព្រះវិហារ។ នៅលើកំណាត់ផ្លូវជាតិលេខ៦ ក្នុងភូមិសាស្ត្រខេត្តកំពង់ធំ ។
ជុំវិញការឃាត់ រថយន្តដឹកអង្ករដំណើបនេះ មិនទាន់មានការ អះអាងជាផ្លូវការពី សមត្ថកិច្ចមន្ត្រីពាក់ព័ន្ធ នៅឡើយទេ ។ ប៉ុន្តែប្រភពក្រៅផ្លូវការ បានឲ្យដឹងថា រថយន្តទាំងនេះ បានធ្វើសកម្មភាព ដឹកអង្កដំណើបចេញពី ច្រកកំពង់ស្រឡៅ ក្នុងខេត្តព្រះវិហារ តាមផ្លូវជាតិលេខ៦ លុះមកដល់ភូមិសាស្ត្រ ខេត្តកំពង់ធំ ក៏ត្រូវសមត្ថកិច្ចឃាត់តែម្ដង។ ប្រភពបន្តថា ក្រោយនគរបាល សេដ្ឋកិច្ចឃាត់ចាប់ រថយន្តទាំង៣នេះ ស្រាប់តែមានមន្ត្រីគយ១រូប បានចេញមុខអន្ដរាគមន៍ តែសមត្ថកិច្ចជំនាញ មិនព្រមតាមការស្នើសុំ។
ជាមួយគ្នានេះ នៅព្រឹកថ្ងៃទី១ ខែកញ្ញា ឆ្នាំ២០២៥ នេះ ប្រភពក្រៅផ្លូវការដដែល បន្ថែមបានឱ្យដឹង បន្ថែមថា រថយន្តទាំង ៣គ្រឿងនេះ មានច្បាប់អនុញ្ញាតឲ្យដឹកតែ ៦០០គីឡូក្រាម ប៉ុន្តែជាក់ស្ដែង រថយន្តនេះ ដឹងអង្កររហូតដល់ទៅ ២៨តោន។
ទោះយ៉ាងណារហូត ដល់ម៉ោង១២ថ្ងៃត្រង់នេះ សារព័ត៌មាន នៅមិនទាន់ទទួលបាន ការបញ្ជាក់អះអាងជាផ្លូវ ការណាមួយ ពីចំណាត់ការ ច្បាស់លាស់របស់ លោកព្រះរាជអាជ្ញា អមសាលា ដំបូងខេត្តកំពង់ធំ នៅឡើយទេ ។
ពាក់ព័ន្ធករណីនេះ មានការរិះគន់ ចំពោះមន្ត្រីច្រកកំពង់ស្រឡៅ ជុំវិញការអនុញ្ញាតឲ្យ មានការនាំចូលទំនិញ ពីប្រទេសថៃ ខណ:ប្រទេសកម្ពុជា កំពុងមានជម្លោះ ព្រំដែនជាមួយថៃ ហើយពលរដ្ឋ កំពុងធ្វើពហិការទំនិញថៃ ស្រាប់តែមានរថយន្ត ខ្នាតយក្សដឹកអង្ក ដំណើបរាប់សិបតោន ចូលមកទីផ្សារកម្ពុជាទៅវិញ៕
