(ភ្នំពេញ)៖ សម្ដេចតេរជោ ហ៊ុន សែន កាលពីថ្ងៃទី២៦ ខែមិថុនា ឆ្នាំ២០២៥កន្លងទៅ បានព្យាករណ៍ថា ទីក្រុងបាងកក នឹងមានការផ្លាស់ប្ដូរ នាយករដ្ឋមន្រ្តីថ្មី ហើយបើតាមស្ថានការណ៍ អាចមិនដល់៣ខែផង។ នៅពេលនេះត្រឹមតែ២ខែ និង៣ថ្ងៃប៉ុណ្ណោះ តុលាការធម្មនុញ្ញថៃ បានប្រកាសដកហូត តំណែងនាយករដ្ឋមន្រ្តី ពីលោកស្រី Paetongtarn Shinawatra ដែលជាកូនស្រីពៅ របស់លោក Thaksin Shinawatra ជាផ្លូវការ នៅថ្ងៃទី២៩ ខែសីហា ឆ្នាំ២០២៥។
ការដកដំណែង របស់លោកស្រី Paetongtarn Shinawatra ធ្វើឡើងបន្ទាប់ពី តុលាការធម្មនុញ្ញ បានសម្រេចព្យួរ តំណែងកាលពីថ្ងៃទី០១ ខែកក្កដា ឆ្នាំ២០២៥កន្លងទៅ ក្រោយពីមាន សមាជិកព្រឹទ្ធសភាថៃ ចំនួន៣៦នាក់ បានរួមគ្នាដាក់ពាក្យ បណ្តឹងចោទប្រកាន់ លោកស្រីអតីត នាយករដ្ឋមន្រ្តីរូបនេះថា មានភាពមិនស្មោះត្រង់ ក្នុងនាមជាមេដឹកនាំប្រទេស និងបំពានក្រម សីលធម៌នៃរដ្ឋធម្មនុញ្ញ អំឡុងកិច្ចសន្ទនាតាមទូរស័ព្ទ ជាមួយសម្តេចតេជា ហ៊ុន សែន ប្រធានព្រឹទ្ធសភានៃកម្ពុជា ពាក់ព័ន្ធបញ្ហាវិវាទ ព្រំដែនរវាងប្រទេសទាំងពីរ ដែលក្រោយមក សំឡេងនៃកិច្ចសន្ទនានោះ ត្រូវបានបែកធ្លាយ ជាសាធារណៈ។
សូមជម្រាបផងដែរថា នាយឧត្តមសេនីយ៍ផុតលេខ ផ្កាយមាស៥ សម្តេចតេជោ ហ៊ុន សែន ប្រធានក្រុម ឧត្តមប្រឹក្សាផ្ទាល់ ព្រះមហាក្សត្រ និងជាប្រធានព្រឹទ្ធសភា បានបង្ហាញការព្យាករណ៍ថា នៅទីក្រុងបាងកក នឹងមានការផ្លាស់ ប្តូរនាយករដ្ឋមន្រ្តីថ្មី យ៉ាងយូរប្រមាណ៣ខែទៀត ដែលជានាយករដ្ឋមន្រ្តី ដែលកែសម្រួល ក្នុងទំនាក់ទំនងរវាងកម្ពុជា និងថៃបាន។
ប្រសាសន៍របស់ សម្តេចតេជោ ហ៊ុន សែន បានធ្វើឡើងនៅព្រឹ កថ្ងៃទី២៦ ខែមិថុនា ឆ្នាំ២០២៥ ក្នុងឱកាស ដែលសម្តេចបាន អញ្ជើញចុះសួរសុខទុក្ខ និងពិនិត្យស្ថានភាពកងទ័ពកម្ពុជា ដែលកំពុងឈរជើង ដ៏អង់អាចក្លាហានបំផុត ការពារទឹកដីជាប់ព្រំដែនថៃ។
សម្តេចតេជោ ហ៊ុន សែន នៅពេលនោះមាន ខ្លឹមសារយ៉ាងដូច្នេះថា៖ «ខ្ញុំក៏សង្ឃឹមថា នៅទីក្រុងបាងកកនឹង មានការផ្លាស់ប្តូរ នាយករដ្ឋមន្ត្រី ខ្ញុំគិតថាសម្រាប់ខ្ញុំ គឺប្រមាណជា ៣ខែទៅចុះនឹងមាន នាយករដ្ឋមន្ត្រីថ្មី ក៏ប៉ុន្តែបើតាមសភាព ការណ៍អាចមិន ដល់៣ខែទៀតផង ក៏អាចថាបាន»៕
