(ភ្នំពេញ)៖ ឯកឧត្ដម ពេញ ធារម្យ អតីតអភិបាល រងខេត្តកំពត ត្រូវបានប្រកាសឱ្យ ចូលកាន់មុខតំណែង អភិបាលរង នៃគណៈអភិបាលរាជធានីភ្នំពេញ ជំនួស ឯកឧត្ដមកើត ឆែ អភិបាលរង នៃគណៈអភិបាលរាជធានីភ្នំពេញ ខណៈឯកឧត្ដម កើត ឆែ ត្រូវបានតែងតាំងជា អភិបាលរងខេត្តកំពត រួចហើយកាលពីថ្ងៃ២៧ ខែសីហា ឆ្នាំ២០២៥កន្លងមកនេះ។
ពិធីប្រកាសចូលកាន់ មុខតំណែងអភិបាលរង នៃគណៈអភិបាល រាជធានីភ្នំពេញនេះ បានធ្វើឡើងនារសៀល ថ្ងៃទី២៩ ខែសីហា ឆ្នាំ២០២៥នេះ ក្រោមអធិបតីភាព ឯកឧត្ដមសន្តិបណ្ឌិត ម៉ៅ ច័ន្ទតារា រដ្ឋលេខាធិការ ប្រចាំការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានវត្តមាន ចូលរួមពីឯកឧត្ដម ម៉ប់ សារិន ប្រធានក្រុមប្រឹក្សា រាជធានីភ្នំពេញ និង ឯកឧត្ដម ឃួង ស្រេង អភិបាល នៃគណៈអភិបាល រាជធានីភ្នំពេញ នៅសាលារាជធានីភ្នំពេញ។
ឯកឧត្ដម ឃួង ស្រេង អភិបាលរាជធានីភ្នំពេញ បានមានប្រសាសន៍ លើកឡើងថា៖ គណៈបញ្ជាការឯកភាព រាជធានីភ្នំពេញ រក្សាបាននូវសន្តិសុខ សុវត្ថិភាពយ៉ាងល្អប្រសើរ មិនឱ្យប្រជាពលរដ្ឋ មានការព្រួយបារម្ភឡើយ។ ជាមួយគ្នានេះដែរ ខណៈដែល នៅតាមព្រំដែន មានការប៉ះទង្គិចគ្នាដោយអាវុធ ដែលបង្កឡើងដោយ ទាហានថៃ រំលោភមកលើ បូរណភាពទឹកដីកម្ពុជា រដ្ឋបាលរាជធានីភ្នំពេញ បានគៀងគរសប្បុរជន ឱ្យចូលរួមជាមួយរដ្ឋបាលរាជធានី ក្នុងការបរិចាក គ្រឿងឧបភោគ បរិភោគ សម្ភារៈប្រើប្រាស់ និងថវិកាដើម្បី ប្រគល់ជូនទៅបងប្អូន កងទ័ពជួរមុខ និងបងប្អូនជា ជនភៀសសឹក។ គ្រឿងឧបភោគ បរិភោគ សម្ភារៈប្រើប្រាស់ និងថវិកាដែលបាន មកពីសប្បុរសជន រដ្ឋបាលរាជធានីភ្នំពេញបានយកទៅ ប្រគល់ជូនដល់កងទ័ពជួរមុខ និងជនភៀសសឹក បានចំនួន២១លើក។
ឯកឧត្ដម ឃួង ស្រេង អភិបាលរាជធានីភ្នំពេញ បានបន្តទៀតថា៖ អនុវត្តតាមការចង្អុល ណែនាំពីសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋបាលរាជធានី បានរៀបចំរថយន្ត ក្រុងសម្រាប់ដឹក ជញ្ជូនពលករមក ពីប្រទេសថៃ ដោយបានប្រើប្រាស់ រថយន្តចំនួន៤៨០គ្រឿង។ យើងបានធ្វើ ការអភិវឌ្ឍរាជធានី ភ្នំពេញឱ្យកាន់តែរីកចំរើន ហើយកាលពីថ្ងៃទី១០ ខែកក្កដា ឆ្នាំ២០២៥កន្លងមក ដោយមានការអនុញ្ញាតិ ដ៏ខ្ពង់ខ្ពស់ពីសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា យើងបានដាក់ឱ្យប្រើប្រាស់ ជាបណ្តោះអាសន្ន ស្ពានអាកាស សម្តេចធិបតី ហ៊ុន ម៉ាណែត។
យើងបានបង្កើតឱ្យ មានផ្លូវថ្មើរជើងចតុមុខ ដែលទទួលបានការ ពេញនិយមយ៉ាងខ្លាំងពី ភ្ញៀវជាតិនិងបរទេស មកដើរលេងកំសាន្ត ក្នុង១ថ្ងៃសៅរ៍ឬថ្ងៃអាទិត្យ ពី៨ទៅ១០ម៉ឺននាក់ក្នុងមួយថ្ងៃ រហូតធ្វើឱ្យរាជធានីភ្នំពេញ ជាប់ចំណាត់ថ្នាក់ លេខ២លើពិភពលោក ឈ្មោះថាជាទីក្រុង ប្រជុំដោយភាពរីករាយ នៅពេលរាត្រី។
ក្នុងឱកាសនោះដែរ ឯកឧត្ដម ឃួង ស្រេង អភិបាល នៃគណៈអភិបាល រាជធានីភ្នំពេញ បានណែនាំ ឯកឧត្ដម ពេញ ធារម្យ អភិបាលរង រាជធានីភ្នំពេញថ្មី ដែលទើបប្រកាស ចូលកាន់តំណែង ត្រូវយកចិត្តទុកដាក់ ក្នុងការបំពេញការងារ ដោយសហការ ជាមួយរដ្ឋបាលខណ្ឌទាំង១៤ សង្កាត់ទាំង១០៥ មន្ទីរអង្គភាពនានា អង្គការសង្គមស៊ីវិល ពិសេសគឺសាមគ្គីភាព សាមគ្គីភាពផ្ទៃក្នុងឲ្យបានល្អ។
ក្នុងឱកាសនោះដែរ ឯកឧត្ដមសន្តិបណ្ឌិត ម៉ៅ ច័ន្ទតារា ក៏បានលើកឡើងពីស្ថានភាពនៃ ការប៉ះទង្គិចគ្នារវាង កងទ័ពកម្ពុជាជាមួយ នឹងកងទ័ពថៃ កាលពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ដែលសង្គ្រាមនេះ បានបំផ្លិចបំផ្លាញ ទ្រព្យសម្បត្តិ អាយុជីវិតកងទ័ពនិង ប្រជាពលរដ្ឋស្លូតត្រង់ ជាច្រើននាក់។
ឯកឧត្ដម ក៏បានថ្លែងនូវការ អរគុណចំពោះ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ កម្ពុជាដែលបានស្វែង រកសន្តិភាពជូនកម្ពុជា នៅថ្ងៃទី២៨ ខែកក្កដា ឆ្នាំ២០២៥ ដែលឈានទៅដល់ មានបទឈប់បាញ់ ដោយគ្មានលក្ខខណ្ឌ។ ឯកឧត្ដមរដ្ឋលេខាធិការ ប្រចាំការបានបញ្ជាក់ថា៖ បើទោះបីមានបទឈប់បាញ់ក្តី ក៏ប៉ុន្តែស្ថានភាព ព្រំដែននៅតែមានបញ្ហា ស្មុគស្មាញមិនចេះចប់ បង្កឡើងដោយទាហាន ថៃឈ្លានពាន។
ឯកឧត្ដមសន្តិបណ្ឌិត ម៉ៅ ច័ន្ទតារា ក៏បានថ្លែងនូវកា រអរគុណផងដែរ ចំពោះក្រុមប្រឹក្សា និងគណៈអភិបាល រាជធានីភ្នំពេញ ដែលបានសម្រេច នូវលទ្ធផលការងារ យ៉ាងល្អប្រសើរ ដែលនឹងរុញកម្ពុជា ឱ្យសម្រេចបាននូវ មហិច្ឆតារបស់ខ្លួន ក្លាយជាប្រទេសដែល មានចំណូលមធ្យម កម្រិតខ្ពស់នៅឆ្នាំ ២០៣០ និងក្លាយជាប្រទេសមាន ចំណូលខ្ពស់នៅឆ្នាំ២០៥០។
ជាមួយមួយគ្នានេះ ដែរឯកឧត្ដម ពេញ ធារម្យ អភិបាលរង រាជធានីដែលត្រូវ បានតែងតាំងថ្មីបាន ប្តេជ្ញាចិត្តថា៖ ដើម្បីឆ្លើយតបទៅ នឹងទំនុកចិត្តរបស់ រាជរដ្ឋាភិបាលក៏ដូចជា ថ្នាក់ដឹកនាំគ្រប់លំដាប់ថ្នាក់ លោកនឹងខិតខំបំពេញការងារ ការពាររាជរដ្ឋាភិបាល ទោះក្នុងតម្លៃណាក៏ដោយ ប្តេជ្ញាគោរពតាមគោល ការណ៍ណែនាំរបស់ រាជរដ្ឋាភិបាលឱ្យបាន ម៉ឹងម៉ាត់បំផុត។ ប្តេជ្ញាគោរពតាមសេចក្តី សំរេចនានារបស់ក្រសួង មហាផ្ទៃ ។ចូលរួមអនុវត្តឱ្យ បានជោគជ័យនូវ គោលនយោបាយភូមិ សង្កាត់សុវត្ថិភាព។ ប្តេជ្ញាធានារក្សាសន្តិសុខ សុវត្ថិភាពនិងរក្សា សន្តិភាពអោយបាន ទោះបីក្នុងតម្លៃណាក៏ដោយ។ គោរពតាមការណែនាំ របស់ឯកឧត្ដម ឃួង ស្រេង អភិបាល នៃគណៈអភិបាល រាជធានីភ្នំពេញ ឱ្យបានម៉ឹងម៉ាត់ បំផុតនិងខិតខំបំពេញ ការងារប្រកបដោយស្មារតី បុរេសកម្ម៕
