(ខេត្តពោធិ៍សាត់)៖ រសៀលថ្ងៃសុក្រ ទី២៩ ខែសីហា ឆ្នាំ២០២៥ ឯកឧត្តម ខូយ រីដា អភិបាល នៃគណៈអភិបាល ខេត្តពោធិ៍សាត់ អមដំណើរ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញកាត់ ប្រធានវិញ្ញាសា និងពិនិត្យស្ថានភាព ទូទៅនៅមណ្ឌល ប្រឡងអនុវិទ្យាល័យ ពោធិ៍សាត់ ក្នុងខេត្តពោធិ៍សាត់ រសៀលថ្ងៃទី២ នៃការប្រឡង សញ្ញាបត្រមធ្យម សិក្សាទុតិយភូមិ សម័យប្រឡង៖ ២៨-២៩ សីហា ២០២៥ ដោយមានការ ចូលរួមពីសំណាក់ ឯកឧត្តម រដ្ឋលេខាធិការ ក្រសួងអប់រំ យុវជន និងកីឡា និងជាប្រធានគណៈ មេប្រយោគប្រចាំ ខេត្តពោធិ៍សាត់ លោកអភិបាល រងខេត្ត លោកប្រធានមន្ទីរអប់រំ យុវជននិងកីឡាខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ។
សូមបញ្ជាក់ថា ខេត្តពោធិ៍សាត់ មានបេក្ខជនដែលបាន ចុះឈ្មោះប្រឡងមធ្យម សិក្សាទុតិយភូមិ (បាក់ឌុប)ឆ្នាំសិក្សា ២០២៤-២០២៥ សម័យប្រឡងថ្ងៃទី២៨-២៩ ខែសីហា ឆ្នាំ២០២៥នេះ មានចំនួន៣,៩២៥អង្គ/នាក់ ស្រី២,២៩០ នាក់ ក្នុងព្រះសង្ឃចំនួន៥អង្គ។ មានចំនួន០៦មណ្ឌល ប្រឡងក្នុងនោះមាន៖ វិទ្យាល័យពោធិ៍សាត់ ចំនួន២មណ្ឌល អនុវិទ្យាល័យពោធិ៍សាត់ ចំនួន២មណ្ឌល បឋមសិក្សាពោធិ៍សាត់ ចំនួន១មណ្ឌល និងអនុវិទ្យាល័យព្រែកស្តី ចំនួន១មណ្ឌល សរុបមានចំនួន១៥៩បន្ទប់។
ជាថ្មីម្តងទៀត សូមអំពាវនាវដល់ក្មួយៗ ជាបេក្ខជនទាំងអស់ បន្តយកចិត្តទុកដាក់ ថែរក្សាសុខភាពឱ្យរឹងមាំ និងត្រូវគោរពបទបញ្ញត្តិ នៃការប្រឡងឱ្យ បានល្អប្រសើរ ជាពិសេសមិន ត្រូវយកតាមខ្លួន នូវឧបករណ៍ អេឡិចត្រូនិកគ្រប់ប្រភេទ ឬសំណេរឯកសារផ្សេងៗ ចូលក្នុងមណ្ឌលប្រឡង និងបន្ទប់ប្រឡង ជាដាច់ខាត និងមិនត្រូវប្រព្រឹត្តសកម្មភាព ផ្ទុយនឹងបទបញ្ញត្តិនានា នៃការប្រឡងឡើយ៕
