(ខេត្តបាត់ដំបង)៖ នៅព្រឹកថ្ងៃសុក្រ ទី២៩ ខែសីហា ឆ្នាំ២០២៥ លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង បានអញ្ជើញទទួលជួបជាមួយ ឯកឧត្តម ឡាយ ឈុនហាំង ប្រធានទូទៅរបស់ក្រុមហ៊ុន ស៉ីធីរាយស៍ អ៉ីមផត អិចផត ( រោងចក្រកិនស្រូវ កែច្នៃអង្ករឡាយសែ) និង លោក ឡាយ ឈុនហុក។ ក្នុងឱកាសនោះដែរ ឯកឧត្តមបាននាំយកនូវម៉ាសការពារពីសារធាតុគីមីផ្សេងៗ ចំនួន ៣៥០ ឈុត សម្រាប់ផ្តល់ជូនដល់ កម្លាំងនគរបាលកំពុង ឈរជើងនៅជួរមុខ ការពារអធិបតេយ្យ ជាតិ បូរណភាពទឹកដី ក្នុងភូមិសាស្រ្ត ខេត្តបាត់ដំបង។
សូមបញ្ជាក់ផងដែលថា នេះមិនមែនជាលើកទី១ទេ ដែល ឯកឧត្តម ប្រធានក្រុមហ៊ុន នាំយកនូវអំណោយ មកផ្តល់ជូនដល់ អង្គភាពស្នងការដ្ឋាន នគរបាលខេត្តបាត់ដំបង ជានិច្ចជាកាល ឯកឧត្តម តែងតែចលនាកៀរគរ ផ្តល់ការគាំទ្រ និងនាំយកនូវអំណោយ ជាស្បៀង គ្រឿងឧបភោគ បរិភោគ ផ្សេងៗ ដើម្បីជួយបំពេញ តម្រូវការខ្វះខាតរបស់ អង្គភាពស្នងការដ្ឋាន នគរបាលខេត្តបាត់ដំបង។
លោកឧត្តមសេនីយ៍ទោ ស្នងការនគរបាលខេត្ត ក៏បានថ្លែងអំណរ គុណយ៉ាងជ្រាលជ្រៅ ដល់ឯកឧត្តម ដែលបានជួបសំដែង ការគួរសម ថែមទាំងនាំមកនូវ ម៉ាសការពារផ្សែងពុល ឧបត្ថម្ភដល់ស្នងការដ្ឋាន ខេត្តបាត់ដំបង នៅពេលនេះ សូមជូនពរដល់ឯកឧត្តម ព្រមទាំងសហការីទាំងអស់ មានសុខភាពល្អ ក្រុមហ៊ុនកាន់តែរីកចម្រើន និងជួបពុទ្ធិពរទាំង បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
