(ខេត្តបាត់ដំបង)៖ នាព្រឹកថ្ងៃព្រហស្បតិ៍ ទី២៨ ខែសីហា ឆ្នាំ២០២៥ ឯកឧត្តម សុខ លូ អភិបាលនៃគណៈ អភិបាលខេត្តបាត់ដំបង បានអញ្ជើញបើក ប្រធានវិញ្ញាសាជា និមិត្តរូបសម្រាប់ព្រឹកថ្ងៃទី១ នៃការប្រឡង សញ្ញាបត្រមធ្យម សិក្សាទុតិយភូមិ សម័យប្រឡង៖ ២៨ សីហា ២០២៥ នៅមណ្ឌលប្រឡង សាកលវិទ្យាល័យ ជាតិបាត់ដំបង ដោយបានបង្ហាញ អំពីការពិនិត្យ ភាពបិទជិត និងត្រាលើស្រោម ប្រធានវិញ្ញាសានៅ ចំពោះមុខបេក្ខជន។
ក្នុងឱកាសនោះ ឯកឧត្តមអភិបាល ខេត្តគូសបញ្ជាក់ថា វិញ្ញាសាត្រូវបានរក្សាទុក បានយ៉ាងហ្មត់ចត់ត្រឹមត្រូវ ដោយគ្មានអ្នកណា ដឹងមុននោះទេ។ ឯកឧត្តម សុខ លូ បានលើកទឹកចិត្ត ដល់បេក្ខជនត្រូវតាំង ស្មារតីឱ្យបាននឹង ខិតខំប្រឡង និងជូនពរដល់ បេក្ខជនទាំងអស់ ប្រឡងជាប់បាន និទ្ទេសល្អៗគ្រប់ៗគ្នា។ ជាមួយគ្នានោះ អាណាព្យាបាលមកពី តាមបណ្ដាស្រុកនានា ក្នុងភូមិសាស្រ្តខេត្តបាត់ដំបង ដែលជូនកូនៗ មកប្រឡង នៅក្រុងបាត់ដំបង បានបង្ហាញអារម្មណ៍ រំភើបរីករាយនិងមាន មោទនភាពដែល បានឃើញកូនៗ ខិតខំប្រឹងប្រែងសិក្សា តាំងថ្នាក់ដំបូងរហូត មកដល់បានប្រឡង បញ្ចប់ថ្នាក់ទី១២។ អាណាព្យាបាល បង្ហាញក្ដីរំពឹងជឿជាក់ និងជូនពរកូនៗឱ្យប្រឡងជាប់ បានលទ្ធផលល្អ។
សូមជម្រាបថា នៅឆ្នាំសិក្សា ២០២៤-២០២៥នេះ ក្រសួងអប់រំ យុវជន និងកីឡា បាននិងកំពុងរៀបចំការ ប្រឡងសញ្ញាបត្រមធ្យម សិក្សាទុតិយភូមិក្នុង ដំណើរការសំណេរ ប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៨-២៩ ខែសីហា ឆ្នាំ២០២៥ ដោយអនុវត្តគោលការណ៍ ទាំង៤នៃការប្រឡង គឺច្បាប់ យុត្តិធម៌ តម្លាភាព និងលទ្ធផលទទួលយកបាន។
អនុវត្តតាមការណែនាំ របស់ក្រសួងអប់រំ យុវជន និងកីឡា ដំណើរការប្រឡង ត្រូវបានចូលរួមផ្ដល់ កិច្ចសហការយ៉ាងស្អិត រមួតពីរដ្ឋបាលខេត្ត រដ្ឋបាលក្រុង ស្រុក អាជ្ញាធរដែនដី ស្នងការនគរបាលខេត្ត កងរាជអាវុធហត្ថខេត្ត មន្ទីរសុខាភិបាល នៃរដ្ឋបាលខេត្ត មន្ទីរអង្គភាពពាក់ព័ន្ធ អង្គភាពប្រឆាំង អំពើពុករលួយ សហភាពសហព័ន្ធយុវជនកម្ពុជា និងគ្រឹះស្ថានសិក្សាដែល ជាមណ្ឌលប្រឡងនានា។
សូមបញ្ជាក់ថា មណ្ឌលប្រឡងនៅ ខេត្តបាត់ដំបង ត្រូវបានរៀបចំប្រមូលផ្ដុំ ដែលមានមណ្ឌលប្រឡង សរុបចំនួន១៤មណ្ឌល ស្ថិតក្នុងក្រុងបាត់ដំបង ដែលមានបេក្ខជនសរុប ៩,៦៩៧នាក់ ក្នុងនោះស្រី៥,៦៤៧នាក់ ត្រូវជា៣៩១បន្ទប់៕
