(ភ្នំពេញ)៖ ឯកឧត្តម ឧត្តមសេនីយ៍ឯក ប៊ុនស៊ីន ផាតខ្លាង មេបញ្ជាការដា្ឋន កងទ័ពភូមិភាគទី២ នៃព្រះរាជាណាចក្រថៃ និងមេបញ្ជាការដ្ឋាន យោធភូមិភាគទី៤ នៃព្រះរាជាណាចក្រកម្ពុជា ឯកឧត្តម ឧត្តមសេនីយ៍ឯក ពៅ ហេង បានឯកភាពគ្នា មិនពង្រីកវិសាលភាព និងទំហំនៃវិវាទ រួមបញ្ចូលទាំងសកម្មភាព បង្កហេតុរបស់ទាហាន ឬប្រជាជន ដែលអាចនាំឱ្យ មានភាពតានតឹង ដូចជាសម្តីអុជអាល និងសកម្មភាព របស់ទាហាន ដែលទន្ទ្រាន ចូលទីតាំងរបស់ភាគីម្ខាងទៀត នៅក្រោយពេល ដែលបទឈប់បាញ់ ចូលជាធរមាន នៅម៉ោង ២៤:០០នាទី (ម៉ោងក្នុងស្រុក) ថ្ងៃទី២៨ ខែកក្កដា ឆ្នាំ២០២៥។
នេះបើយោងតាមសេចក្តី ប្រកាសព័ត៌មានរួម ស្ដីពីលទ្ធផលនៃ កិច្ចប្រជុំវិសាមញ្ញគណៈ កម្មាធិការព្រំដែន ថ្នាក់យោធភូមិភាគ (RBC) រវាងយោធភូមិភាគទី៤ របស់កម្ពុជា និងកងទ័ពភូមិភាគទី២របស់ថៃ នៅថ្ងៃទី២៧ ខែសីហា ឆ្នាំ២០២៥ ដោយភាគីថៃធ្វើជាម្ចាស់ផ្ទះ។
ប្រភពដដែល បានបន្តថា ភាគីទាំងពីរបានបញ្ជាក់ សាជាថ្មីនូវការប្តេជ្ញាចិត្ត យ៉ាងមុតមាំក្នុងការអនុវត្ត សេចក្តីសម្រេចនៃកិច្ច ប្រជុំពិសេស នៅថ្ងៃទី២៨ ខែកក្កដា ឆ្នាំ២០២៥ និងកិច្ចប្រជុំវិ សាមញ្ញរបស់គណៈ កម្មាធិការព្រំដែនទូទៅ (GBC) នៅថ្ងៃទី៧ ខែសីហា ឆ្នាំ២០២៥។
ជាមួយគ្នានោះ ភាគីទាំងពីរ បានឯកភាពគ្នា ក្នុងការរក្សាទំនាក់ទំនង ជាប្រចាំរវាងបណ្ដាយោធភូមិភាគ និងតំបន់ យោធា ព្រមទាំងបណ្តាអង្គភាព នៅតាមបណ្ដោយ ព្រំដែននៃប្រទេសទាំងពីរ និងខិតខំដោះស្រាយរាល់បញ្ហា ដោយសន្តិវិធី និងបញ្ចៀសការប៉ះទង្គិចគ្នា។ ភាគីទាំងពីរក៏បាន គូសបញ្ជាក់ពីសារៈ សំខាន់នៃការពង្រឹង ទំនាក់ទំនងបន្ថែមទៀតនៅគ្រប់កម្រិត ដើម្បីកសាងជំនឿទុកចិត្ត និងលើកកម្ពស់ភាព ជាអ្នកជិតខាងល្អ។
តាមសេចក្ទិប្រកាស ព័ត៌មានខាងលើ ភាគីទាំងពីរ ក៏បានប្តេជ្ញាចិត្តផងដែរ ក្នុងការជៀសវាងការ ចែកចាយព័ត៌មានមិនពិត ឬព័ត៌មាន ក្លែងក្លាយ ដើម្បីកាត់បន្ថយភាពតានតឹង កាត់បន្ថយសាធារណមតិអវិជ្ជមាន និងព្យាយាមបង្កើត នូវវិធានការជាក់ស្តែង សំដៅលើកកម្ពស់ បរិយាកាសអំណោយផល សម្រាប់កិច្ចសន្ទនា ដោយសន្តិវិធី។
សេចក្តីប្រកាស ព័ត៌មានដដែលនោះ បាមសង្កត់ធ្ងន់ថា រាល់ការធ្វើសកម្មភាព ដើម្បីធានាសុវត្ថិភាព រួមបញ្ចូលទាំងការល្បាត និងការសាងសង់ ឬការពង្រីក ហេដ្ឋារចនាសម្ព័ន្ធ ឬលេណដ្ឋាន ត្រូវមានលក្ខណៈការពារខ្លួនសុទ្ធសាធ និងស្ថិតនៅតែ ខាងខ្លួនឯងប៉ុណ្ណោះ។ ភាគីនីមួយៗអាច អនុវត្តទៅបាន ដោយអនុលោម ពេញលេញតាមលក្ខខណ្ឌ នៃបទឈប់បាញ់ ដែលបានឯកភាពគ្នា ដោយភាគីទាំងពីរ នៅក្នុងកិច្ចប្រជុំពិសេស កាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាចាយ៉ា និង កិច្ចប្រជុំវិសាមញ្ញ របស់គណៈកម្មាធិការ ព្រំដែនទូទៅ (GBC) កាលពីថ្ងៃទី៧ ខែសីហា ឆ្នាំ២០២៥ នៅទីក្រុង គូឡាឡាំពួរ ប្រទេសម៉ាឡេស៊ី។ វិធានការនេះមានគោលបំណង លើកកម្ពស់បរិយាកាស នៃជំនឿទុកចិត្តទៅវិញទៅមក និងកិច្ចសហប្រតិបត្តិការរវាងភាគីទាំងពីរ៕
