ឯកឧត្តមរដ្ឋមន្ត្រី ថោ ជេដ្ឋា និង ឯកឧត្តមរដ្ឋមន្ត្រី ជា វ៉ាន់ដេត អញ្ជើញចុះហត្ថលេខា លើអនុស្សរណៈនៃការ យោគយល់គ្នាស្តី ពីកិច្ចសហប្រតិបត្តិ ការដាក់ឱ្យប្រើថ្នាល ផ្ទៀងផ្ទាត់ឯកសារ verify.gov.kh

(ភ្នំពេញ)៖ នាព្រឹកថ្ងៃពុធ ៤កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៧ ខែសីហា ឆ្នាំ២០២៥នេះ នៅទីស្ដីការ ក្រសួងបរិស្ថាន ឯកឧត្តម ថោ ជេដ្ឋា រដ្ឋមន្ត្រីក្រសួង ធនធានទឹក និងឧតុនិយម និងឯកឧត្តម ជា វ៉ាន់ដេត រដ្ឋមន្ត្រីក្រសួង ប្រៃសណីយ៍ និងទូរគមនាគមន៍ បានអញ្ជើញចុះហត្ថលេខា លើអនុស្សរណៈ នៃការយោគយល់គ្នា ស្តីពីកិច្ចសហប្រតិបត្តិការ ដាក់ឱ្យប្រើថ្នាលផ្ទៀងផ្ទាត់ ឯកសារ verify.gov.kh ការរៀបចំហេដ្ឋា រចនាសម្ព័ន្ធអ៊ីនធឺណិត និងការបណ្តុះបណ្តាល ជំនាញឌីជីថលជូនមន្ត្រី រាជការក្រោមឱវាទ ក្រសួងធនធានទឹក និងឧតុនិយម។

សូមជម្រាបថា ការចុះអនុស្សរណៈ នៃការយោគយល់គ្នានេះ គឺធ្វើឡើងក្នុងគោល បំណងដើម្បីជំរុញការ ធ្វើបរិវត្តកម្មឌីជីថល វិស័យធនធានទឹក និងឧតុនិយម តាមរយៈការរៀបចំ ប្រព័ន្ធបច្ចេកវិទ្យាឌីជីថល ការរៀបចំហេដ្ឋារចនា សម្ព័ន្ធនិងការតភ្ជាប់ អ៊ីនធើណិតឥតខ្សែ និងការបណ្ដុះបណ្តាល ជំនាញឌីជីថល ព្រមទាំងការដាក់ឱ្យប្រើប្រាស់ ថ្នាលផ្ទៀងផ្ទាត់ឯកសារ verify.gov.kh និង ថ្នាល ឬសេវារដ្ឋាភិបាល ឌីជីថលថ្មីៗ ដែលអភិវឌ្ឍដោយ ក្រសួងប្រៃសណីយ៍ និងទូរគមនាគមន៍ ស្របតាមគោល នយោបាយរដ្ឋាភិបាល ឌីជីថលកម្ពុជា ២០២២-២០៣៥ និងបញ្ចកោណទី៥ នៃយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

សូមបញ្ជាក់ថា ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាល អភិវឌ្ឍដោយក្រសួងប្រៃសណីយ៍ និងទូរគមនាគមន៍ និងបានដាក់ឱ្យ ប្រើក្នុងគោលបំណង ដើម្បីលុបបំបាត់ការ ក្លែងបន្លំឯកសារ ផ្តល់ភាពងាយ ស្រួលក្នុងការប្រើ និងផ្ទៀងផ្ទាត់ភាព ត្រឹមត្រូវនៃឯកសារ តាមរយៈការស្កេន QR Code ស្តង់ដាលើសន្លឹកឯកសារ ដោយមិនតម្រូវឱ្យ មានការធ្វើនីត្យានុកូលកម្ម លើឯកសារថតចម្លង ក្នុងទម្រង់ជាក្រដាសឡើយ ហើយដែលនឹងក្លាយ ជាឧបករណ៍ដ៏សំខាន់ដែល អនុញ្ញាតឱ្យស្ថាប័ន និងប្រជាពលរដ្ឋអាច ផ្ទៀងផ្ទាត់ឯកសារផ្លូវការ ប្រកបដោយតម្លាភាព សុវត្ថិភាព និងភាពជឿជាក់៕