(ភ្នំពេញ)៖ គិតមកដល់ពេលនេះ ទោះជាចំនួនជនភៀសសឹក ដែលមកស្នាក់នៅមណ្ឌល សុវត្ថិភាពបានថយចុះបន្តិចក្តី ប៉ុន្តែការយកចិត្ត ទុកដាក់ក៏នៅតែបន្ត ខណៈមានមនុស្ស ជិតបីម៉ឺននាក់កំពុងរស់នៅ ជាជនភៀសសឹកនៅឡើយ។
គណៈកម្មាធិការគ្រប់គ្រង គ្រោះមហន្តរាយបាន ឱ្យដឹងនៅព្រឹកថ្ងៃទី២២ ខែសីហា ឆ្នាំ២០២៥នេះថាយោង តាមរបាយការណ៍ គិតត្រឹមថ្ងៃទី២១ ខែសីហាម្សិលមិញនេះ ជនភៀសសឹកបាន ត្រឡប់ទៅលំនៅឋាន ចំនួន ៨៨៦គ្រួសារ និងមានជនភៀសសឹក បន្តស្នាក់នៅមណ្ឌល សុវត្ថិភាពសរុបចំនួន ៨.៦៩៤គ្រួសារ ស្មើនឹងចំនួនមនុស្ស ២៨.៤៤២នាក់ ក្នុងនោះមាននៅខេត្តចំនួន៤ រួមមាន ខេត្តឧត្តរមានជ័យ, បន្ទាយមានជ័យ, ព្រះវិហារ និងខេត្តសៀមរាប។
តាងនាមសម្តេច មហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកមម្ពុជា និង ជាប្រធាន គណៈកម្មាធិការជាតិ គ្រប់គ្រងគ្រោះមហន្តរាយ រាជរដ្ឋាភិបាលបាន បន្តគិតគូរយកចិត្តទុកដាក់ ចំពោះសុខទុក្ខបងប្អូន ប្រជាពលរដ្ឋជន ភៀសសឹកទាំងអស់ និងបានត្រៀមស្បៀង បម្រុងគ្រប់គ្រាន់ ដែលមានរដ្ឋបាល ថ្នាក់ក្រោមជាតិជាសេនាធិការ និងជាលេខាធិការដ្ឋាន គ.ជ.គ.ម។
ក្នុងនាមគណៈកម្មាធិការ ជាតិគ្រប់គ្រងគ្រោះមហន្តរាយ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តីក៏ បានណែនាំដល់អាជ្ញាធរខេត្ត, មន្រ្តីជំនាញ និងសមត្ថកិច្ច គ្រប់លំដាប់ថ្នាក់ សូមបន្តយកចិត្ត ទុកដាក់ពីសុខទុក្ខ បងប្អូនប្រជាពលរដ្ឋ ភៀសសឹកដែលបន្តស្នាក់ នៅជំរំឱ្យទទួលបានស្បៀងគ្រប់គ្រាន់ និងជួយលើការ ថែទាំសុខុមាលភាពភៀសសឹក ពិសេសស្រ្តី និងកុមារឱ្យបានល្អប្រសើរ៕
