(ខេត្តកំពត)៖ ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំសិក្សា(២០២៤-២០២៥) និងធ្វើឡើងនៅថ្ងៃទី ២៨-២៩ ខែសីហាខាងមុខនេះ ហើយសិស្សានុសិស្សថ្នាក់ទី១២នៅខេត្តកំពតបានប្រាប់ថា ពួកគេបានត្រៀមខ្លួនរួចរាល់ហើយ បើទោះជាពេលនេះ មានអារម្មណ៍ភ័យខ្លះ អរខ្លះក៏ពិតមែន ប៉ុន្តែតាមរយៈលទ្ធផលនៃការប្រឹងប្រែងរៀនសូត្រកន្លងមក ពួកគេរំពឹងថានឹងប្រឡងជាប់និទ្ទេសល្អច្រើន។
សិស្សានុសិស្សថ្នាក់ទី១២ នៅវិទ្យាល័យមិត្តភាព កម្ពុជា-ជប៉ុន (កំពតក្រុង) បានឲ្យដឹងថា ពួកគេបានត្រៀមខ្លួនរួចរាល់ សម្រាប់ការប្រឡង យកសញ្ញាបត្រ មធ្យមសិក្សាទុតិយភូមិ ដែលនឹងធ្វើឡើង នៅថ្ងៃទី២៨-២៩ ខែសីហាខាងមុននេះ។
ក្រុមសិស្សដែល ជ្រើសរើសយកផ្នែក វិទ្យាសាស្ត្រទាំងនោះ បានគូសបញ្ជាក់ថា ពួកគេរំពឹងយ៉ាង មុតមាំថានឹងប្រឡង ជាប់និទ្ទេសល្អ ខណៈដែលអំឡុង ពេលឈប់សម្រាកនេះ ជាពេលរំលឹកមេរៀន និងធ្វើលំហាត់ចាស់ៗឡើងវិញ ដោយការកំណត់ ពេលវេលាធ្វើ ឲ្យកាន់តែខ្លីរហ័សជាងមុន ហើយខំព្យាយាម ថែសុខភាព ពង្រឹងស្មារតី ដើម្បីប្រមូល អារម្មណ៍ឲ្យល្អ និងមានសមាធិខ្ពស់ នៅថ្ងៃប្រឡងមកដល់។
ប្រធានមន្ទីរអប់រំ យុវជន និងកីឡាខេត្តកំពត លោក សូ ភារិទ្ធ បានបញ្ជាក់ប្រាប់ នៅព្រឹកថ្ងៃទី២០ ខែសីហា ឆ្នាំ២៩២៥នេះថា សម្រាប់ការប្រឡង សញ្ញាបត្រមធ្យម សិក្សាទុតិយភូមិ សម័យប្រឡង ២៨ សីហា ២០២៥ ខាងមុខនេះ ខេត្តកំពតមាន ១០ មណ្ឌល ស្មើ ២១៥បន្ទប់ មានបេក្ខជន សរុប៥៣១៧នាក់ (ស្រី២៩៩៥នាក់) ក្នុងនោះថ្នាក់វិទ្យា សាស្ត្រមាន៣មណ្ឌល (វិទ្យាល័យកំពតក្រុង ២មណ្ឌល និងអនុវិទ្យាល័យ ហ៊ុនសែនអង្គរជ័យ ១មណ្ឌល) ស្នើ៥៥បន្ទប់ មានបេក្ខជនសរុប ១៣៤៤នាក់ (ស្រី៨៥៨នាក់)។ ថ្នាក់វិទ្យាសាស្ត្រសង្គម មាន៧មណ្ឌល (វិ.ព្រះរាជសម្ភារ វិ.ឌីប៉ុកសាមគ្កី វិ.ត្រសេកកោង អនុវិទ្យាល័យហ៊ុនសែនជុំគ្រៀល វិ.ព្រះនរោត្តមរណឫទ្ធិ វិ.សម្តេចជាស៊ឹមអង្គរជ័យ និងសាលាបឋម អេងមាសតានី ) មាន១៦០បន្ទប់ បេក្ខជនសរុប ៣៩៧៣នាក់ ស្រី២១៣៧នាក់៕ សេង ណារិទ្ធ
