(ខេត្តស្វាយរៀង)៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ ព្រះមហាក្សត្រ និងជាតំណាងរាស្ត្រ មណ្ឌលស្វាយរៀង អមដំណើរដោយ លោកជំទាវ ឯក សុវណ្ណភារៈ សមាជិកាគណៈកម្មការ ផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយមនៃរដ្ឋសភា ឯកឧត្តម ជ័យ ស៊ុន សមាជិកគណៈកម្មការទី១០ នៃរដ្ឋសភា និងលោកជំទាវ ដួង វណ្ណា នាព្រឹកថ្ងៃទី១៨ ខែសីហា ឆ្នាំ២០២៥ បានអញ្ជើញចូលរួម ពិធីបុណ្យសព លោកអនុសេនីយ៍ឯក ញឹក ប៊ុនសោន និងសំណេះ សំណាលសួរសុខទុក្ខ ជាមួយក្រុមគ្រួសារសព ដែលរៀបចំឡើង នៅវត្តពោធិ៍ញ្ញាណ ហៅវត្តតាប៉ោ ស្ថិតក្នុងស្រុកកំពង់រោទិ៍ ខេត្តស្វាយរៀង។
នៅក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន បាននាំយកបច្ច័យចំនួន ១២លាន ៤០ម៉ឺរៀល និង ៨០០$ និងបច្ច័យរបស់ រដ្ឋបាលខេត្តស្វាយរៀង នូវថវិកា ៥លានរៀល ដឹកនាំដោយ ឯកឧត្តម ប៉េង ពោធិ៍សា អភិបាលនៃគណៈ អភិបាលខេត្តស្វាយរៀង រួមជាមួយនឹងថវិការ បស់សមាគមឧកញ៉ា ចំនួន ១ម៉ឺនដុល្លារ ដែលដឹកនាំ ដោយអ្នកឧកញ៉ា អ៊ាន អេឡែន និងរួមដំណើរដោយ អ្នកឧកញ៉ា ឡាវ កាំង អ្នកឧកញ៉ា យី រដ្ឋា អ្នកឧកញ៉ា លី ប៉ោយូ សរុបប្ច័យបុណ្យចំនួន ១៧.៤០០.០០០រៀល និង ១០.៨០០$។
នៅក្នុងសមាន ទុក្ខដ៏ក្រៀមក្រំនេះ សម្តេចកិត្តិសង្គហបណ្ឌិត ព្រមទាំងគណៈ ប្រតិភូអមដំណើរបាន ចូលរួមរំលែកទុក្ខជាមួយ ភរិយាលោក អនុសេនីយ៍ឯក ញឹក ប៊ុនសោន ព្រមទាំងក្រុមគ្រួសារ និងសូមបួងសួង ដល់តេជៈបារមី នៃព្រះពុទ្ធ ព្រះធម៌ ព្រះសង្ឃ តាមជួយថែរក្សា ដួងវិញ្ញាណក្ខន្ធរបស់ លោកអនុសេនីយ៍ឯក ញឹក ប៊ុនសោន បានទៅសោយសុខ ក្នុងឋានសុគតិភព កុំបីឃ្លៀងឃ្លាតឡើយ។
សូមជម្រាបជូនថា លោកអនុសេនីយ៍ឯក ញឹក ប៊ុនសោន ជាយោធាបម្រើការងារ នៅកងពលតូចអន្តរាគមន៍លេខ៨ ប្រចាំការនៅសមរភូមិ ជួរមុខតំបន់ភ្នំទ្រព្យ បានពលីក្នុងសមរភូមិ កាលពីថ្ងៃទី២៦ ខែកក្កដា ឆ្នាំ២០២៥ ក្នុងបុព្វហេតុការពារជាតិ មាតុភូមិ បូរណភាពទឹកដី និងអធិបតេយ្យភាពជាតិ ពីការឈ្លានពានរបស់កងទ័ពថៃ ។
មរណភាពរបស់ លោកអនុសេនីយ៍ឯក ញឹក ប៊ុនសោន គឺជាការបាត់បង់នូវឧត្តមស្វាមី ឪពុក ដែលប្រកប ដោយព្រហ្មវិហារធម៌។ មិនត្រឹមតែប៉ុណ្ណោះ លោកអនុសេនីយ៍ឯក បានចូលរួមប្រយុទ្ធ យ៉ាងអង់អាចក្លាហាន និងស្វិតស្វាញប្រឆាំង ជាមួយទ័ពឈ្លានពានថៃ បានបង្ហាញគំរូវីរភាព របស់វីរៈយុទ្ធជន ដែលបានធ្វើឲ្យ ប្រជាពលរដ្ឋខ្មែរ គ្រប់រូបចងចាំជានិច្ច នូវគុណូបការៈដ៏ថ្លៃថ្លានេះ៕
