(ភ្នំពេញ)៖ នាព្រឹក ថ្ងៃទី១៦ ខែសីហា ឆ្នាំ២០២៥ ឯកឧត្តម ហ៊ុន ម៉ានី ប្រធានសហភាព សហព័ន្ធយុវជនកម្ពុជា (ស.ស.យ.ក.) បានអញ្ជើញជាអធិបតី ក្នុងកម្មវិធីវគ្គបណ្តុះបណ្តាលស្តីពី ការចុះឈ្មោះស្វែងរកការងារ ដល់សមាជិក សមាជិកា ស.ស.យ.ក. ជាភ្នាក់ងារព័ត៌មាន ទីផ្សារការងារនៃវិស័យការងារ និងបណ្តុះបណ្តាលវិជ្ជាជីវៈ នៅមជ្ឈមណ្ឌលសន្និបាត និងពិព័រណ៍កោះពេជ្រ (អគារ G H I)។ ពិធីនេះមានវត្តមានអញ្ជើញចូលរួមពីសំណាក់ ឯកឧត្តម លោកជំទាវ អនុប្រធាន ស.ស.យ.ក. សមាជិកគណៈអចិន្ត្រៃយ៍គណៈកម្មាធិការកណ្តាល និងសមាជិក សមាជិកា ស.ស.យ.ក. មកពីបណ្តាលរាជធានីខេត្តប្រមាណ ២០០០នាក់។
ជាកិច្ចចាប់ផ្តើម ឯកឧត្តម ហេង សួរ សមាជិកគណៈអចិន្ត្រៃយ៍ គណៈកម្មាធិការកណ្តាល និងជាប្រធានក្រុមការងារ សហភាពសហព័ន្ធ យុវជនកម្ពុជា វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ បានសម្តែងការស្វាគមន៍ យ៉ាងកក់ក្តៅចំពោះគណធិបតី និងសមាជិកា សមាជិកាគ្រប់រូប ដែលបានឆ្លៀតពេលចូលរួម ក្នុងពិធីដ៏សំខាន់មួយនេះ ជាមួយក្រសួងការងារ និងបណ្តុះបណ្តាលវិជ្ជាជីវៈ ក្នុងការផ្តល់ព័ត៌មានទីផ្សារ ការងារដល់ប្រជាពលរដ្ឋ អាចរកការងារបានពីម្ចាស់ សហគ្រាសឲ្យកាន់តែមានប្រសិទ្ធភាព។
ឯកឧត្តម បានបន្តថា ជាក់ស្តែង នៅប្រទេសកម្ពុជាយើង មានរោងចក្រសហគ្រាស ជាច្រើនកំពុងត្រូវការ បុគ្គលិករាប់សិបម៉ឺននាក់ ក្នុងខណៈពេលដែល ប្រជាពលករដែលវិល ត្រឡប់មកពីប្រទេសថៃ ប្រមាណជាង ៩០ម៉ឺននាក់ កំពុងតែស្វែងរកការងារ ហេតុនេះការចូលរួម សម្របសម្រួលពីសមាជិក សមាជិកា ស.ស.យ.ក. ក្នុងការផ្តល់ព័ត៌មានការងារ ជូនប្រជាពលករយើង នឹងអាចជួយជីវភាពរស់ នៅរបស់ពួកគាត់ ក៏ដូចជាកុំឲ្យម្ចាស់សហគ្រាស និងប្រជាពលរដ្ឋកំពុងស្វែង រកការងារលេងបិទពួននឹងគ្នា។
គួរបញ្ជាក់ផងដែរថា ពិធីនេះ មានគោលបំណង បណ្តុះបណ្តាលដល់សមាជិក សមាជិកា ស.ស.យ.ក. តាមបណ្តារាជធានី ខេត្ត ដែលជាជនបង្គោល និងជាភ្នាក់ងារដ៏សំខាន់ នៅក្នុងការស្វែងរក ការងារជូនប្រជាពលករខ្មែរ ដែលត្រលប់មកពីប្រទេសថៃវិញ ក្រោមស្មារតី «ខ្មែរជួយរកការងារឱ្យខ្មែរ»។
