(ភ្នំពេញ)៖ នៅថ្ងៃទី៩ ខែសីហា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ នៃគណៈកម្មាធិការជាតិ គ្រប់គ្រងគ្រោះមហន្តរាយ និងលោកស្រី ក្ល៊ែរ ឃូណន់ (Claire Conan) នាយិកា អង្គការកម្មវិធី ស្បៀងអាហារពិភពលោក (World Food Program) បានអញ្ជើញប្រគល់ស្បៀងជា អំណោយរបស់រាជរដ្ឋាភិបាល ជូនជនភៀសសឹក សរុបចំនួន ៤៥៥២គ្រួសារ មកពីឃុំចំនួន៤ ក្នុងស្រុកបន្ទាយអំពិល ខេត្តឧត្តរមានជ័យ។
អំណោយរបស់រាជរដ្ឋាភិបាល គឺជាការបង្វែអំណោយ ពីកម្មវិធីស្បៀងដែលត្រូវ ឧបត្ថម្ភតាមសាលារៀន មកប្រគល់ជូនជនភៀស សឹកវិញបន្ទាប់ពីកើតមាន ជម្លោះតាមបន្ទាត់ព្រំដែន ដោយការប្រគល់ស្បៀង នៅថ្ងៃនេះ ក្នុងមួយគ្រួសារ ទទួលបានអង្ករ ៥០គីឡូក្រាម។
នាឱកាសនោះ ឯកឧត្តម ទេសរដ្ឋមន្រ្តី គន់ គីម បានកោតសរសើរ ដល់រដ្ឋបាលខេត្ត អាជ្ញាធរមូលដ្ឋាន ពិសេសកម្មវិធីស្បៀង អាហារពិភពលោក ដែលរៀបចំបង្វែ អំណោយជាអង្កររបស់ រាជរដ្ឋាភិបាលកម្ពុជាដែល ត្រូវឧបត្ថម្ភតាមសាលារៀន ប៉ុន្តែសាលារៀន មិនអាចបើកដំណើរការ បានដោយសារជម្លោះព្រំដែន ហើយប្តូរមកប្រគល់ជូន ជនភៀសសឹកវិញ គឺជាការយកចិត្តទុកដាក់ ដ៏ចាំបាច់បំផុតដល់ជន ភៀសសឹកឱ្យទទួលបាន ស្បៀងគ្រប់គ្រាន់ និងការស្នាក់ នៅបណ្តោះអាសន្ន មួយយ៉ាងសមរម្យ។
ទន្ទឹមគ្នានេះ ក្នុងនាមគណៈកម្មាធិការជាតិ គ្រប់គ្រងគ្រោះមហន្តរាយ ឯកឧត្តម ទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ហ៊ុន ម៉ាណែត ប្រមុខរាជរដ្ឋាភិបាល ដែលបានផ្តល់អំណោយ និងឃីតជាច្រើន បូករួមជាមួយអំណោយ ពីសប្បុរសជន បានជួយឱ្យការរៀបចំ មណ្ឌលសុវត្ថិភាពគ្រប់ ទីតាំងទទួលបាន ស្បៀងគ្រប់គ្រាន់។
ជាមួយគ្នានេះ ឯកឧត្តម ទេសរដ្ឋមន្រ្តី បានថ្លែងថា ផ្អែកតាមសភាពការណ៍ តាមបន្ទាត់ព្រំដែនមានការ ឯកភាពគ្នារវាងរាជ រដ្ឋាភិបាលកម្ពុជា និងរាជរដ្ឋាភិបាល ថៃកាលពីថ្ងៃទី២៨ ខែកក្កដា ឆ្នាំ២០២៥ បងប្អូនជនភៀសសឹកអាចត្រឡប់ ទៅលំនៅដ្ឋានវិញបណ្តើរៗ ដើម្បីធ្វើយ៉ាងណា ឱ្យជីវភាពរស់នៅរបស់ ប្រជាពលរដ្ឋវិលទៅប្រក្រតី។
នាឱកាសនោះដែរ ឯកឧត្តម ទេសរដ្ឋមន្រ្តី បានពាំនាំការផ្ដាំ សួរសុខទុក្ខពីសំណាក់ សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនជនភៀសឹកទាំងអស់ សូមបន្តថែរក្សាសុខភាព ពិសេសស្រ្តីមានផ្ទៃពោះ និងកុមារ៕
