(ភ្នំពេញ)៖ តំណាងរបស់ សហរដ្ឋអាមេរិក គឺនាយឧត្តមនាវី Samuel Paparo មេបញ្ជាការ បញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក និង ឯកអគ្គរដ្ឋទូតអាមេរិក Edgard Kagan ប្រចាំម៉ាឡេស៊ី បានបញ្ជាក់ប្រាប់ប្រមុខការពារជាតិកម្ពុជា នាយឧត្តមសេនីយ៍ ទៀ សីហា អំពីជំហររបស់ សហរដ្ឋអាមេរិក ក្នុងការគាំទ្របទឈប់បាញ់ ដែលប្រធានាធិបតី Donald Trumpបានផ្តួចផ្តើម ហើយភាគីម៉ាឡេស៊ី ដែលជាប្រធានអាស៊ានប្តូរវេន បានដឹកនាំកម្ពុជា-ថៃ សម្រេចបានក្នុងការ អនុវត្តបទឈប់បាញ់។
តំណាងរបស់អាមេរិកទាំងពីរ ក៏បានបញ្ជាក់ថា នឹងតាមដានឲ្យការអនុវត្តនេះ ប្រកបដោយភាពជោគជ័យ និងមានប្រសិទ្ធភាព។ លោកនឹងចូលរួមគាំទ្រ ផ្នែកភស្តុភា និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន (AMT) ឲ្យបានលឿនបំផុត។ ថែមទាំងបានបង្ហាញពីអ្វីដែលជាការអនុវត្តបន្តរបស់សហរដ្ឋអាមេរិក រួមមាន៖ ការធ្វើផែនការយោធា, គ្រឿងបរិក្ខារ, ប្រព័ន្ធបញ្ជូនកម្លាំង, ប្រព័ន្ធឃ្លាំមើលតាមអាកាស និងសម្ភារបច្ចេកទេសទំនើបជាច្រើនទៀត។ ទាំងនេះបង្ហាញពីការត្រៀមខ្លួន របស់ពួកគាត់ក្នុងការចូលរួម ឲ្យមានសន្តិភាពពិតប្រាកដ។
