(ភ្នំពេញ)៖ កាលពីថ្ងៃទី៤ ខែសីហា ឆ្នាំ២០២៥នេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំកិច្ច ប្រជុំពិគ្រោះយោបល់ ដើម្បីដោះស្រាយបញ្ហា ប្រឈមរបស់ផ្នែកឯកជន ក្នុងវិស័យកម្មន្តសាល សហគ្រាសធុនតូចនិងមធ្យម និងសេវាកម្ម។ កិច្ចប្រជុំនេះត្រូវបាន ដឹកនាំសម្របសម្រួលដោយ ឯកឧត្តមរដ្ឋមន្ត្រី ហែម វណ្ណឌី និងមានការចូលរួម ពីតំណាងវិស័យឯកជន សមាគមនិងសហព័ន្ធធុរកិច្ច ដៃគូអភិវឌ្ឍន៍ ក្រសួង-ស្ថាប័នពាក់ព័ន្ធ និងមន្ទីររាជធានី-ខេត្ត សរុបប្រមាណ២៣០នាក់។
ឯកឧត្តម ហែម វណ្ណឌី បានលើកឡើងពី ការផ្លាស់ប្តូរក្នុងខ្សែ ច្រវាក់ផ្គត់ផ្គង់តំបន់ ដែលបណ្តាលមកពីបញ្ហា ជម្លោះព្រំដែនរវាងកម្ពុជា-ថៃ ដោយផ្តោតលើឱកាស សម្រាប់អ្នកផលិតក្នុងស្រុក។ ឯកឧត្តមបានលើកឡើងថា៖ “បញ្ហាប្រឈមនេះក៏ជា ឱកាសសម្រាប់ផលិតករ ក្នុងស្រុករបស់យើងដែរ។ យើងបានឃើញកំណើន នៃតម្រូវការផលិតផល ពីក្រុមហ៊ុនផ្គត់ផ្គង់ក្នុងស្រុក ហើយក្រុមហ៊ុនក្នុង ស្រុកជាច្រើនបានបង្ហាញ សមត្ថភាពប្រកួតប្រជែង កាន់តែខ្ពស់នៅក្នុងទីផ្សារ។”
ឯកឧត្តមក៏បានសង្កត់ធ្ងន់ លើភាពចាំបាច់ក្នុងការកសាង ប្រព័ន្ធអេកូឡូស៊ីខ្សែច្រវាក់ ផ្គត់ផ្គង់ក្នុងស្រុកពេញលេញមួយ ដែលមានទាំងពីការ ផ្គត់ផ្គង់វត្ថុធាតុដើម និងការកែច្នៃ រហូតដល់សេវាឡូជីស្ទីក ការធានាគុណភាព និងលទ្ធភាពចូលក្នុងទីផ្សារ។
ឯកឧត្តមរដ្ឋមន្ត្រីបានបន្ថែមថា៖ “យើងមិនត្រឹមតែត្រូវផលិត ឱ្យបានច្រើនប៉ុណ្ណោះទេ តែត្រូវផលិតឱ្យបាន កាន់តែល្អប្រសើរ។ ដើម្បីបំពេញតម្រូវការទីផ្សារ និងដើម្បីប្រកួតប្រជែងបាន ទំនិញរបស់យើង ត្រូវតែមានស្តង់ដាគុណភាព និងសុវត្ថិភាព។”
នេះជាឆ្នាំទី៣ ក្នុងអាណត្តិទី៧ របស់រាជរដ្ឋាភិបាល ដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំកិច្ចប្រជុំ ពិគ្រោះយោបល់ ជាមួយផ្នែកឯកជន បន្ទាប់ពីការរៀបចំ ពីរជុំកន្លងមក ដើម្បីដោះស្រាយបញ្ហាប្រឈម និងសំណើរបស់ ផ្នែកឯកជនក្នុងវិស័យកម្មន្តសាល សហគ្រាសធុនតូចនិងមធ្យម និងសេវាកម្ម។
សម្រាប់ជុំទី៣នេះ ក្រសួងបានប្រមូល បញ្ហាប្រឈមពី ផ្នែកឯកជននៅ ទូទាំងប្រទេស ដោយបានបង្រួម ជា បញ្ហាប្រឈម ជាក់លាក់ចំនួន ១២ រួមបញ្ចូលទាំង បញ្ហាថ្លៃឡូជីស្ទីក និងថ្លៃដើមផលិតកម្មខ្ពស់ ការប្រកួតប្រជែងមិនស្មើភាព លទ្ធភាពទទួលបានហិរញ្ញវត្ថុ ការឈានចូលទីផ្សារ កម្លាំងពលកម្មជំនាញ បញ្ហាបច្ចេកវិទ្យា និងបច្ចេកទេសផលិតកម្ម ព្រមទាំងបញ្ហា ប្រឈមក្នុងការធ្វើ អនុលោមភាព ដូចជាការចុះបញ្ជីក្រុមហ៊ុន ការចុះបញ្ជីផលិតផល ការបំពេញបែបបទ និងនីតិវិធីគយ និងពន្ធដារ និងការអនុលោមតាម ស្តង់ដាជាដើម។
ផ្នែកឯកជនក៏បាន លើកឡើងពីតម្រូវការ សេវាកម្មគាំទ្រ ដូចជាសេវាមាត្រាសាស្ត្រ សេវាមន្ទីរពិសោធន៍ និងសេវាវិញ្ញាបនបត្រកម្ម រួមទាំងវិញ្ញាបនបត្រ បញ្ជាក់ប្រភពដើមទំនិញ។ ក្នុងកិច្ចប្រជុំនេះ ក្រសួង-ស្ថាប័នពាក់ព័ន្ធបានផ្តល់ការបកស្រាយ និងដំណោះស្រាយសម្រាប់ បញ្ហាប្រឈមនីមួយៗ ដែលបានលើកឡើង ដោយផ្នែកឯកជន។
ឯកឧត្តម ហែម វណ្ណឌី ក៏បានបញ្ជាក់ការប្តេជ្ញាចិត្ត របស់រាជរដ្ឋាភិបាល ក្នុងការអនុវត្តកំណែទម្រង់ រួមទាំងការពង្រីកសេវាសាធារណៈ តាមប្រព័ន្ធឌីជីថល និងការបង្កើត យន្តការសម្របសម្រួល ដើម្បីដោះស្រាយបញ្ហា ប្រឈមជាក់ស្តែង របស់ផ្នែកឯកជន។
ឯកឧត្តមបានលើកឡើងថា៖ “រាជរដ្ឋាភិបាលបានស្តាប់ បញ្ហាប្រឈមរបស់ផ្នែកឯកជន ហើយបាននិងកំពុងចាត់ វិធានការជាក់ស្តែង រាប់បញ្ចូលទាំងការកែសម្រួលច្បាប់ និងបទប្បញ្ញត្តិ ការផ្តល់ការលើកលែង និងអត្ថប្រយោជន៍ផ្សេងៗ រហូតដល់ការកែលម្អ សេវាសាធារណៈ។ ប៉ុន្តែយើងក៏ត្រូវការឱ្យ វិស័យឯកជនមានបុរេ សកម្ម និងភាពសកម្ម ដើម្បីចាប់យកឱកាស និងបង្កើតខ្សែច្រវាក់ ផ្គត់ផ្គង់ដែលមានភាពធន់។”
ឯកឧត្តមក៏បានជំរុញ ឱ្យក្រុមហ៊ុនក្នុងស្រុកខិតខំ ពង្រីកខ្សែច្រវាក់ផលិតកម្មរបស់ខ្លួន និងបង្កើតការងារបន្ថែមទៀត សម្រាប់ពលករកម្ពុជា ពិសេសពលករដែល ត្រឡប់មកពីប្រទេសថៃ។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំរបាយការណ៍ ស្តីពីបញ្ហាប្រឈម និងដំណោះស្រាយ សម្រាប់ផ្នែកឯកជន ក្នុងវិស័យកម្មន្តសាល សហគ្រាសធុនតូចនិងមធ្យម និងសេវាកម្ម ដើម្បីដាក់ជូន ក្រុមប្រឹក្សាអភិវឌ្ឍន៍កម្ពុជា បន្តសម្របសម្រួល និងស្វែងរកអន្តរាគមន៍ ចាំបាច់របស់រាជរដ្ឋាភិបាល៕
