(ភ្នំពេញ)៖ ថ្លែងសន្ទរកថាបិទ សិក្ខាសាលាពិគ្រោះយោបល់ និងប្រមូលធាតុចូល លើសេចក្តីព្រាង «ព្រះរាជក្រឹត្យស្តីពីលក្ខន្តិកៈដោយឡែកនៃអង្គគ្រូបង្រៀន» ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានមានប្រសាសន៍ថា “មូលធនមនុស្ស ដើរតួនាទីយ៉ាង សំខាន់ក្នុងការប្រែក្លាយ ចក្ខុវិស័យកម្ពុជាឱ្យទៅជាការពិត នៅឆ្នាំ២០៥០ខាងមុខ” ។
ប្រយោគនេះ សំដៅលើការអភិវឌ្ឍធនធានមនុស្ស ធានាបាននូវសមត្ថភាព ប្រកួតប្រជែងប្រកប ដោយជោគជ័យ របស់ប្រទេសជាតិ ជាពិសេសនៅក្នុង បរិការណ៍តំបន់ និងសកលលោក។ ដូចនេះ ការពង្រីក និងការពង្រឹងមូលធន មនុស្សគឺជាការចាំបាច់ និងបន្ទាន់ ដើម្បីឆ្លើយតបទៅនឹង តម្រូវការចំពោះមុខ ក៏ដូចជានិន្នាការតំបន់ និងសកលលោក។
មុនថ្លែងប្រសាសន៍នេះ ឯកឧត្តមរដ្ឋលេខាធិការ ប្រចាំការបានលើកឡើងថា “ក្នុងនាម ឯកឧត្តម ហ៊ុន ម៉ានី ឧបនាយករដ្ឋន្រ្តី រដ្ឋមន្រ្តីក្រសួងមុខងារសាធារណៈ និង ក្នុងនាមខ្ញុំផ្ទាល់ ខ្ញុំសូមយកឱកាសនេះ ថ្លែងអំណរគុណ កោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្រ្តីរាជការ ក្រុមការងារបច្ចេកទេសរបស់ក្រសួងមុខងារសាធារណៈ និងក្រសួងអប់រំ យុវជន និងកីឡា អនុគណៈកម្មាធិការគ្រប់គ្រងធនធានមនុស្ស ស្ថាប័ន និងបៀវត្ស អគ្គលេខាធិការដ្ឋាននៃគណៈកម្មាធិការ កែទម្រង់រដ្ឋបាលសាធារណៈ និងតួអង្គពាក់ព័ន្ធទាំងអស់ ដែលបានខិតខំរៀបចំសិក្ខាសាលាដ៏ មានសារៈសំខាន់នេះឡើង។”
ឯកឧត្តមរដ្ឋលេខាធិការប្រចាំការបានបន្តថា “រាជរដ្ឋាភិបាលតែងតែផ្តោតអាទិភាពវិនិយោគលើ «មូលធនមនុស្ស» ដែលជាធនធានដ៏ចាំបាច់មិនអាចខ្វះបានសម្រាប់គ្រប់ការអភិវឌ្ឍសុខភាពរឹងមាំនៃសេដ្ឋកិច្ចជាតិ ការបង្កើតតម្លៃបន្ថែម ការទាក់ទាញវិនិយោគ ការលើកកម្ពស់នវានុវត្តន៍ និងភាពប្រកួតប្រជែងរបស់កម្ពុជា។
ឈរលើស្មារតីនេះ ការគ្រប់គ្រងធនធានមនុស្ស ក្នុងវិស័យអប់រំ តាមអភិក្រម សម្តេចមហាបវរធិបតី នាយករដ្ឋមន្រ្តី គឺ «រើសឱ្យចំ បំពេញឱ្យត្រូវ រក្សាឱ្យនៅ» ដែលប្រៀបបាននឹង «បេះដូងនៃប្រព័ន្ធអប់រំ» តាមរយៈការគ្រប់គ្រង ការផ្ទេរ ការលើកទឹកចិត្ត ការបណ្តុះបណ្តាល និងការអភិវឌ្ឍសមត្ថភាពមន្រ្តី គឺត្រូវគិតគូររៀបចំឱ្យបានច្បាស់លាស់ និងគ្រប់ជ្រុងជ្រោយ ដើម្បីធានាឱ្យប្រព័ន្ធអប់រំកម្ពុជា អាចពង្រឹងសមត្ថភាពឆ្លើយតបទៅនឹងតម្រូវការរបស់ប្រជាពលរដ្ឋនាពេលបច្ចុប្បន្ន និងអាចត្រៀមខ្លួនរួចជាស្រេច ដើម្បីឆ្លើយតបទៅនឹងបរិការណ៍នៃការប្រែប្រួលយ៉ាងឆាប់រហ័ស និងពិបាកប៉ាន់ស្មាននូវសភាពការណ៍សង្គមសេដ្ឋកិច្ច ទាំងក្នុងកម្រិតតំបន់ និងសាកល។”ឯកឧត្តម បានបន្ថែម។
ជាចុងក្រោយ ឯកឧត្តម យក់ ប៊ុនណា សង្ឃឹមយ៉ាងមុតមាំថាសិក្ខាសាលាពេញមួយថ្ងៃនេះ សិក្ខាកាមទាំងអស់នឹងទទួលបានព័ត៌មានពេញលេញ យល់ដឹងបានកាន់តែច្បាស់ លើការរៀបចំព្រះរាជក្រឹត្យថ្មីនេះ។ ទន្ទឹមនេះ តាមរយៈនៃការរៀបចំព្រះរាជក្រឹត្យថ្មីនេះ អាចនឹងផ្តល់ជាលទ្ធផលរំពឹងទុកមួយចំនួនដូចជា៖ ១.ការលើកកម្ពស់គុណតម្លៃបុគ្គលិកអប់រំ តាមរយៈការបណ្តុះបណ្តាល ការពង្រឹងនិងអភិវឌ្ឍសមត្ថភាពមន្រ្តី ដើម្បីធានាប្រសិទ្ធភាពក្នុងការអនុវត្តការងារ រួមជាមួយការលើកទឹកចិត្ត ឱកាស និងការវិវត្តន៍អាជីពជាបុគ្គលិកអប់រំ ២.ការពង្រឹងនិងអភិវឌ្ឍសមត្ថភាពស្ថាប័នអប់រំនៅថ្នាក់ជាតិ និងរដ្ឋបាលថ្នាក់ក្រោមជាតិ ដើម្បីលើកកម្ពស់គុណភាពនៃការផ្តល់សេវាអប់រំឱ្យកាន់តែល្អប្រសើរ និងខិតជិតប្រជាពលរដ្ឋ ៣.ការបង្កើនប្រសិទ្ធភាព នៃការគ្រប់គ្រងបុគ្គលិកអប់រំ ប្រកបដោយផលិតភាព វិន័យ និងសីលធម៌វិជ្ជាជីវៈ ដើម្បីធានាឱ្យបាននូវការបង្កើនទំនុកចិត្តរបស់ប្រជាពលរដ្ឋលើវិស័យអប់រំកម្ពុជា។
