(ខេត្តកំពត)៖ ដើម្បីជំរុញលើកទឹកចិត្ត ក៏ដូចជាបង្ហាញនូវការដឹងគុណ ចំពោះវីរៈកងទ័ពដែលកំពុង ឈរជើងច្បាំងការពារទឹកដី ពីការឈ្លានពានរបស់ទាហានថៃ និងដើម្បីចូលរួមជួយសម្រួល ដល់ទុក្ខលំបាករបស់ បងប្អូនជនភៀសសឹក ឯកឧត្តម ម៉ាត់ សេត អ្នកតំណាងរាស្ត្រមណ្ឌល ខេត្តកំពតបានដឹកនាំពលរដ្ឋ ខ្មែឥស្លាមធ្វើពិធីថ្វាយ បង្គំបួងសួងសុំសេចក្តីសុខ និងជ័យជម្នះ និងគៀរគរថវិកា និងស្បៀងអាហារមួយ ចំនួនសម្រាប់បរិច្ចាគជូនកងទ័ព និងជនភៀសសឹកនៅតំបន់ព្រំដែន។
ឯកឧត្តម ម៉ាត់ សេត អ្នកតំណាងសាស្ត្រ មណ្ឌលខេត្តកំពត បានប្រាប់ឲ្យដឹង នៅព្រឹកថ្ងៃទី២៨ ខែកក្កដា ឆ្នាំ២០២៥នេះថា ដោយមើលឃើញពីទុក្ខ លំបាករបស់ប្រជាពលរដ្ឋជនភៀសសឹក និងការតស៊ូដ៏អង់អាច ក្លាហានរបស់វីរៈកងទ័ពខ្មែរ ក្នុងការច្បាំងការពារដឹកដី ពីការឈ្លានពានរបស់ទាហានសៀម និងដើម្បីឆ្លើយតបតាមការអំពាវនាវ របស់រាជរដ្ឋាភិបាលកម្ពុជាផង បងប្អូនខ្មែរឥស្លាម នៅភូមិកំពង់កែស ឃុំត្រពាំងសង្កែ ស្រុកទឹកឈូ បានសហការ រៀបចំពិធីថ្វាយបង្គំបួងសួងដល់ព្រះ ដើម្បីសុំសេចក្តីសុខ និងជ័យជម្នះកើតមានដល់វីរៈកងទ័ព និងបងប្អូនជនភៀសសឹក។ ហើយក្នុងនាមជាអ្នកតំណាងរាស្ត្រ ក៏ដូចជាពលរដ្ឋម្នាក់ ឯកឧត្តមគាំទ្រ និងជឿជាក់ចំពោះយន្តការ និងការដឹកនាំរបស់សម្តេចទាំងទ្វេរ ក្នុងការដោះស្រាយជម្លោះព្រំដែន ក៏ដូចជាការបញ្ជាកងទ័ពច្បាំងការពារទឹកដីពីចោរឈ្លានពានសៀម។
ប្រជាពលរដ្ឋខ្មែរឥស្លាម ដែលបានចូលរួមបរិច្ចាគថវិកា និងស្បៀងអាហារ ក៏បានបង្ហាញពីទឹកចិត្តសប្បាយ រីករាយដែលបានចូលរួម ចំណែកជួយជំរុញលើក ទឹកចិត្តដល់វីរៈកងទ័ព និងជួយដល់បងប្អូន ជនភៀសសឹក។ ពួកគាត់ពិតជា មានមោទនភាព ចំពោះវីរៈកងទ័ពខ្មែរ ដែលបានឈរជើងយ៉ាង អង់អាចក្លាហាន និងមុតមាំ ការពារទឹកដី ជាតិមាតុភូមិពីខ្មាំង សត្រូវឈ្លានពាន។
ចំពោះថវិការបរិច្ចាគនៅ ពេលនេះសរុបមានចំនួន ៣ ៧០០ ០០០រៀល និងស្បៀងអាហារមាន៖ អង្ករ ៦៦០គីឡូ មី១២០កេស ត្រីខ២៤យួរ ទឹកត្រី៨យួរ ទឹកស៊ីអ៊ីវ២៦យួរ ទឺកសុទ្ធ៣៥យួរនិង១០កេស បារី១សុង នំម៉ៃឌាស់ ២ប្រអប់ ត្រីងៀត១គីឡូ ទឹកផ្លែឈើ២កេស កាហ្វេ១ថង់។ ហើយថវិកានិងស្បៀងអាហារនេះនឹងប្រគល់ជូនទៅអាជ្ញាធរស្រុកទឹកឈូ ដើម្បីដឹកជញ្ជូនបន្តទៅឲ្យកងទ័ព និងបងប្អូនជនភៀស សឹកនៅតាមតំបន់ព្រំដែន៕ សេង ណារិទ្ធ
