(ខេត្តកែប)៖ នៅព្រឹកថ្ងៃទី២៧ ខែកក្កដា ឆ្នាំ២០២៥ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ឧត្តមប្រឹក្សាផ្ទាល់ព្រះមហាក្សត្រ អ្នកតំណាងរាស្ត្រមណ្ឌលខេត្តកែប និងជាប្រធានកិត្តិយសក្រុមការងារគណបក្សចុះមូលដ្ឋានខេត្តកែប ឯកឧត្តម កែន សត្ថា អនុប្រធានទី១ ក្រុមការងារគណបក្សចុះមូលដ្ឋានខេត្ត ឯកឧត្តម អ៊ុក ថា ប្រធានក្រុមប្រឹក្សាខេត្ត ឯកឧត្តមបណ្ឌិត សោម ពិសិដ្ឋ អភិបាលខេត្ត និងជាប្រធានគណៈកម្មាធិការគណបក្សខេត្តកែប និងលោកជំទាវ ស ម៉ាលីដា សោមពិសិដ្ឋ ឯកឧត្តម លោកជំទាវ លោក លោកស្រី ថ្នាក់ដឹកនាំ មន្ត្រីរាជការ និងពុទ្ធបរិស័ទជិតឆ្ងាយ បាននាំយកនូវទៀនវស្សា ទេយ្យទានទេយ្យវត្ថុ និងបច្ច័យមួយចំនួន ប្រគេនដល់ព្រះសង្ឃដែលគងចាំព្រះវស្សា អស់ត្រីមាស ក្នុងវត្តចំនួន១៧ ទូទាំងខេត្តកែប។
ឆ្លៀតក្នុងឱកាសនោះ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ មានប្រសាសន៍លើកឡើងថា៖ នៅក្នុងព្រះរាជាណាចក្រកម្ពុជារបស់យើង មានវត្តជាង ៥,១៤៦វត្ត មានព្រះសង្ឃ ៦ម៉ីនជាងអង្គ តែងតែគង់ចាំព្រះវស្សានារដូវកាលនេះ។ ក្នុងកាល:ទេស:នេះ រាជរដ្ឋាភិបាលតែងតែគិតគូរអំពីបញ្ហាកង្វះខាតនូវសម្ភារៈទេយ្យវត្ថុផ្សេងៗសម្រាប់ប្រើប្រាស់ក្នុងវត្តនីមួយៗក្នុងពេលគង់ចាំព្រះវស្សា ព្រមទាំងដោះស្រាយជូនបានទាន់ពេលវេលា នេះជាការយកចិត្តទុកដាក់យ៉ាងធំរបស់រាជរដ្ឋាភិបាល ក៏ដូចជាអាជ្ញាធរខេត្ត សម្រាប់ឧបត្ថម្ភគាំទ្រ ព្រះសង្ឃដែលអង្គសិក្សារៀនសូត្រ ក្នុងអំឡុងពេលគងចាំវស្សាមានរយៈពេល ៣ខែ។
សារភ្ជាប់ជាមួយគ្នានេះ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ បានរំលឹកអំពីការអភិវឌ្ឍន៍រីកចម្រើន និងធើ្វអោយប្រទេសកម្ពុជា មានសុខសន្តិភាព ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបន្តវេនដោយសម្តេមហាបវរធិបតី ហ៊ុន ម៉ាណែត នាយករដ្ឋមន្ត្រីនាពេលបច្ចុប្បន្ន តែជាអកុសលប៉ុន្មានថ្ងៃកន្លងទៅនេះ ប្រទេសកម្ពុជារបស់យើង មានការប្រទូស្តរាយគ្នារវាងកងទ័ពកម្ពុជា ថៃ នៅតាមព្រំដែន ដែលបង្កឡើងដោយកងទ័ពថៃឈ្លានពានចង់បានទឹកដីរបស់ប្រទេសកម្ពុជា ក្នុងនោះថៃក៏បានធ្វើការបាញ់បោះទាំងកម្រោល ដែលបណ្តាលឱ្យមាន ការបាត់បង់អាយុជីវិត ទាហាន និងប្រជាពលរដ្ឋ ស្លូតត្រង់នៅតំបន់ជាប់ព្រំដែន។
ស្របពេលដែលព្រំដែនកម្ពុជា ថៃ កាន់តែឡើងកម្តៅ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ អំពាវនាវដល់ប្រជាជនទាំងអស់ ត្រូវរក្សាភាពស្ងប់ស្ងាត់ កុំភ័យស្លន់ស្លោរ ហើយត្រូវមានទំនុកចិត្ត លើរាជរដ្ឋាភិបាលក្នុងការ ការពារបូរណភាពទឹកដីរបស់យើង៕ សេង ណារិទ្ធ
