(កំពង់ធំ)៖ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការ គណៈរដ្ឋមន្រ្តី និងជាប្រធានក្រុមការងារ រាជរដ្ឋាភិបាលចុះ មូលដ្ឋានខេត្តកំពង់ធំ អមដំណើរដោយថ្នាក់ដឹកនាំ និងមន្ត្រីនៃទីស្តីការ គណៈរដ្ឋមន្ត្រី ព្រមទាំងថ្នាក់ដឹកនាំ និងមន្ត្រីរដ្ឋបាលខេត្តកំពង់ធំ បានអញ្ជើញគោរពវិញ្ញាណក្ខន្ធ វរសេនីយ៍ត្រី ជួង លៀប ដែលបានពលីជីវិតជូនជាតិមាតុភូមិ ក្នុងសមរភូមិ នៅព្រំដែនតំបន់ប្រាសាទតាមាន់ធំ ខេត្តឧត្តរមានជ័យ កាលពីថ្ងៃព្រហស្បតិ៍ ១៤រោច ខែអាសាឍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៤ ខែកក្កដា ឆ្នាំ២០២៥ ក្នុងជន្មាយុ ៥១ឆ្នាំ។
ឯកឧត្តម វង្សី វិស្សុត ក្នុងឱកាសនៃការ គោរពវិញ្ញាណក្ខន្ធ នាព្រឹកថ្ងៃទី២៥ ខែកក្កដា ឆ្នាំ២០២៥ បានពាំនាំនូវការរំលែកទុក្ខឥតឧបមា និងការសោកស្តាយ យ៉ាងក្រៃលែង ជាមួយនឹងការដឹងគុណ យ៉ាងជ្រាលជ្រៅពី សំណាក់ រាជរដ្ឋាភិបាល និងប្រជាជនកម្ពុជា ជូនដល់ក្រុមគ្រួសារនៃវីរយុទ្ធជនពលី ដែលបានបាត់បង់នូវស្វាមី ឪពុក និងជីតា ជាទីស្រឡាញ់ ប្រកបដោយព្រហ្មវិហារធម៌។ ជាមួយគ្នានេះ ឯកឧត្តម វង្សី វិស្សុត បានបញ្ជាក់ផងដែរថា ការបាត់បង់ វរសេនីយ៍ត្រី ជួង លៀប គឺជាការបត់បង់នូវយោធិន ស្នេហាជាតិមួយរូប ដែលពោរពេញ ដោយភក្តីភាពចំពោះ ជាតិ សាសនា និងព្រះមហាក្សត្រ។
ឯកឧត្តម វង្សី វិស្សុត ក៏បានបានបញ្ជាក់នូវ ការយកចិត្តទុកដាក់ ដ៏ខ្ពង់ខ្ពស់របស់ សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា និង សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្នាក់ដឹកនាំ និងប្រមុខរាជរដ្ឋាភិបាល ចំពោះ វីរយុទ្ធជនគ្រប់រូប ដែលបានលះ បង់នូវកម្លាំងកាយចិត្ត មិនខ្លាចនឿយហត់ ជាពិសេសបានចូល រួមធ្វើពលិកកម្មគ្រប់បែប យ៉ាងប្រកបដោយឆន្ទៈ មនៈសិការដ៏មោះមុត អង់អាចក្លាហាន ស្មារតីទទួលខុសត្រូវខ្ពស់ ក្នុងបុព្វហេតុការ ពារបូរណភាពទឹកដី និងអធិបតេយ្យភាព ជូនជាតិមាតុភូមិ។
