ខេត្តស្ទឹងត្រែង៖ អាជ្ញាធរខេត្តស្ទឹងត្រែង បានធ្វើពិធីដុតបំផ្លាញគ្រឿងញៀនមានទម្ងន់ ១ពាន់ ០១២គីឡូក្រាម និង ៥១៣,៤៤ក្រាម ដែលបានមកពីប្រតិបត្តិការបង្ក្រាប និងរឹបអូសរបស់កម្លាំងសមត្ថកិច្ចខេត្ត ចាប់ខ្លួនក្រុមឧក្រិដ្ឋជនជួញដូរគ្រឿងញៀនខុសច្បាប់ ៣០នាក់ បញ្ជូនទៅតុលាការខេត្តស្ទឹងត្រែង។
ពិធីដុតបំផ្លាញគ្រឿងញៀនមានទម្ងន់ជាង ១ពាន់គីឡូក្រាមនេះ បានធ្វើឡើងក្រោមប្រធានបទ “រួមគ្នា បង្ការ ទប់ស្កាត់ និងកាត់ផ្តាច់ឫសគល់ នៃបញ្ហាគ្រឿងញៀននៅកម្ពុជា” ក្នុងទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២៥ ដែលប្រារព្ធធ្វើឡើងនាព្រឹកថ្ងៃទី២៤កក្កដា២០២៥ នៅក្នុងបរិវេណអាកាសយានដ្ឋានស្ទឹងត្រែង ស្ថិតក្នុងភូមិស្រែពោធិ៍ សង្កាត់ស្រះឬស្សី ក្រុងស្ទឹងត្រែង ។
អភិបាលរងខេត្ត និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តស្ទឹងត្រែង លោក ធូ ចាន់ពៅ បានថ្លែងថា ក្រុមការងារបានចុះផ្សព្វផ្សាយអប់រំ អំពីផលប៉ះពាល់ និងគ្រោះថ្នាក់នៃការប្រើប្រាស់គ្រឿងញៀន ,ច្បាប់ស្តីពីការត្រួតពិនិត្យគ្រឿងញៀន ផ្សារភ្ជាប់ទៅនឹងការផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព បាន៨៥៧លើក។
លោក ធូ ចាន់ពៅ បានបន្តថា ការចុះបង្ក្រាបការដឹកជញ្ជូន ជួញដូរ រក្សាទុក និងការប្រើប្រាស់ដោយខុសច្បាប់ នូវសារធាតុញៀន នៅក្នុងភូមិសាស្ត្រខេត្តបាន ១៣ករណី ឃាត់ខ្លួនជនសង្ស័យ ៣០នាក់ ស្រី ១នាក់ ,ចាប់យកវត្ថុតាងគ្រឿងញៀនប្រភេទ មេតំហ្វេតាមីនក្រាមពណ៌សថ្លា (ICE) មានទម្ងន់ ១៩គីឡូក្រាម និង ៨៥៦,៥២ក្រាម និងគ្រឿងញៀនប្រភេទកេតាមីនទម្ងន់ ៤១៨គីឡូក្រាម និង ២៩,៧៦ក្រាម ,អនុវត្តដីកាបង្គាប់ឱ្យចាប់ខ្លួនរបស់ចៅក្រមស៊ើបសួរ នៃសាលាដំបូងខេត្តស្ទឹងត្រែង ២ដីកា ,ចាប់ខ្លួនជនត្រូវចោទ ២នាក់ ភេទប្រុស ក្នុងនោះជនជាតិខ្មែរ ១នាក់ និងជនជាតិវៀតណាម ១នាក់ ,ចាត់វិធានការព្យាបាល ស្តារនីតិសម្បទា និងសមាហរណកម្ម បញ្ជូនជនសង្ស័យ ៣នាក់ ភេទប្រុស ជនជាតិខ្មែរ ទៅមណ្ឌលស្តារនីតិសម្បទាបន្សាបគ្រឿងញៀនខេត្តក្រចេះ និងខេត្តបន្ទាយមានជ័យ។
ព្រះរាជអាជ្ញា នៃអយ្យការអមសាលាដំបូងខេត្តស្ទឹងត្រែង លោក កែវ សុធា បានលើកឡើងថា ចាប់ពីថ្ងៃ ទី២៦ខែមិថុនា២០២៤ រហូតមកដល់ថ្ងៃទី ២៦មិថុនា២០២៥ រយៈពេល ១ឆ្នាំពេញ ការដឹកជញ្ជូនគ្រឿងញៀនដោយខុសច្បាប់មាន ១១សំណុំរឿង ,ការដឹកជញ្ជូន និងជួញដូរ ដោយខុសច្បាប់ នូវសារធាតុញៀនមាន ១៧សំណុំរឿង ,ការរក្សាទុក ជួញដូរ ចែកចាយ ដោយខុសច្បាប់ នូវសារធាតុញៀនមាន ៨ សំណុំរឿង និងការជួយដូរ និងចាត់ចែងឲ្យប្រើប្រាស់មាន ៣ សំណុំរឿង។
លោកព្រះរាជអាជ្ញាខេត្តស្ទឹងត្រែង បានបន្តថា ពាក់ព័ន្ធករណីសំណុំរឿងគ្រឿងញៀន ដែលសតម្ថកិច្ច បានរួមសហការគ្នាបង្ក្រាបបានរយៈពេល ១ឆ្នាំកន្លងទៅនេះ មានចំនួនសរុប ៣៩សំណុំរឿង ក្នុងនោះបានដកហូត និងរឹបអូសគ្រឿងញៀនសរុបទម្ងន់១.០១២ គីឡូក្រាម និង ៥១៣,៤៤ក្រាម គ្រឿងញៀនទាំងអស់នេះយើងបានរឹបអូសតាមអំណាចសាលក្រម ៣៤សំណុំរឿង តាមសេចក្តីសម្រេចរបស់ចៅក្រមស៊ើបសួរ ៥សំណុំរឿង ព្រមទាំងធ្វើរដ្ឋបាលនៅតាមក្លឹបកំសាន្តមួយចំនួន រឹបអូសបានបារីអេឡិចត្រូនិចបាន ៣៤០ប្រអប់ ដែលតម្រូវយកមកដុតបំផ្លាញចោលនាពេល ផងដែរ។
លោកព្រះរាជអាជ្ញា កែវ សុធា បានបញ្ជាក់ថា នៅក្នុងឆមាសទី១ ឆ្នាំ២០២៥ មន្ត្រីអនុវត្តច្បាប់ បានចុះបង្ក្រាបករណីដឹកជញ្ជូន ជួញដូរ រក្សាទុក និងប្រើប្រាស់ដោយខុសច្បាប់ នូវសារធាតុញៀន ក្នុងភូមិសាស្ត្រខេត្តស្ទឹងត្រែង ចំនួន ១៣ករណី ឃាត់ខ្លួនជនសង្ស័យ ៣០នាក់និងរឹបអូសវត្ថុតាងសារធាតុញៀនបានរាប់រយគីឡូក្រាមថែមទៀតផង។
អភិបាលខេត្តស្ទឹងត្រែងលោក សរ សុពុត្រា បានថ្លែងថា ការប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនខុសច្បាប់ នៅពេលនេះ មានគោលដៅសំដៅធ្វើយ៉ាងណា បំផុសជាចលនាជាតិមួយ ដែលមានការចូលរួមពីគ្រប់វិស័យ ក្នុងការលើកកម្ពស់ការអប់រំពីផលប៉ះពាល់ និងគ្រោះថ្នាក់នៃគ្រឿងញៀន និងមានវិធានការម៉ឺងម៉ាត់ដាច់ខាត ពីគ្រប់តួអង្គពាក់ព័ន្ធទាំងអស់ ដើម្បីឈានដល់ការកាត់ផ្តាច់ឫសគល់នៃបញ្ហា និងទប់ស្កាត់ការវិលត្រលប់មកវិញ នៃបញ្ហាគ្រឿងញៀន ដែលស្របទៅនឹងពាក្យស្លោករបស់អង្គការសហប្រជាជាតិ គឺ «កាត់ផ្តាច់ការវិវដ្តនៃបញ្ហាគ្រឿងញៀន»។
លោកអភិបាលខេត្តស្ទឹងត្រែង សរ សុពុត្រា បានជំរុញឱ្យមានការអនុវត្តឱ្យមានប្រសិទ្ធភាពខ្ពស់ ចំពោះខ្លឹមសារគោលនយោបាយ «ភូមិ ឃុំ សង្កាត់ មានសុវត្ថិភាព» និង «ភូមិ ឃុំ សង្កាត់ ស គ្មានគ្រឿងញៀន» និងត្រូវបន្តយកចិត្តទុកដាក់ពង្រឹងការអនុវត្តច្បាប់ឲ្យបានម៉ឺងម៉ាត់ ពាក់ព័ន្ធជាមួយបទល្មើសគ្រឿងញៀន ដោយឈរលើគោលការណ៍ «៣កុំ និង១រាយការណ៍» ពោលគឺ «កុំពាក់ព័ន្ធ កុំអន្តរាគមន៍ កុំលើកលែង និងត្រូវរាយការណ៍ដល់អាជ្ញាធរមានសម្ថកិច្ច អំពីករណីគ្រឿងញៀន» នៅក្នុងមូលដ្ឋានរបស់ខ្លួនឱ្យបានទាន់ពេលវេលា៕SAMNEANG
