(ភ្នំពេញ)៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានលើកទឹកចិត្តដល់ បណ្តាក្រុមហ៊ុន សាជីវកម្មធំៗរបស់ចិន ឱ្យបន្តសិក្សាស្វែងយល់ និងពង្រីកការវិនិយោគ ផ្ទាល់នៅកម្ពុជា ជាពិសេសលើ គម្រោងបច្ចេកវិទ្យាបៃតង និងនវានុវត្តន៍ឌីជីថល ដើម្បីរួមចំណែកជំរុញ ការធ្វើទំនើបកម្ម សេដ្ឋកិច្ចរបស់កម្ពុជា។
ក្នុងឱកាសអនុញ្ញាត ឱ្យគណៈគ្រប់គ្រងជាន់ខ្ពស់ នៃក្រុមហ៊ុន សាជីវកម្មធំៗរបស់ចិន ចូលជួបសម្តែងការគួរសម និងពិភាក្សាការងារ នៅទីក្រុងប៉េកាំង សាធារណរដ្ឋប្រជាមានិតចិន កាលពីពេលថ្មីៗនេះ ឯកឧត្តម ស៊ុន ចាន់ថុល បានពិភាក្សាយ៉ាងស៊ីជម្រៅ អំពីកាលានុវត្តភាពវិនិយោគ លើវិស័យយុទ្ធសាស្ត្រសំខាន់ៗ ដែលជាជំនាញរបស់ក្រុមហ៊ុនចិន។
វិស័យដែលត្រូវបាន លើកយកមកពិភាក្សា រួមមាន ការអភិវឌ្ឍថាមពលស្អាត ដូចជា វារីអគ្គិសនី ថាមពលខ្យល់ និងថាមពលពន្លឺព្រះអាទិត្យ ការអភិវឌ្ឍហេដ្ឋារ ចនាសម្ព័ន្ធដឹកជញ្ជូន ព្រមទាំងវិស័យវិស្វកម្មគីមី និងឥន្ធនៈ ដូចជារោងចក្រចម្រាញ់ប្រេង រោងចក្រគីមីឥន្ធនៈ និងរោងចក្រផលិតជីកសិកម្ម។ ឯកឧត្តម ស៊ុន ចាន់ថុល បានវាយតម្លៃខ្ពស់ចំពោះទំនុកចិត្ត និងបំណងវិនិយោគ របស់សាជីវកម្មឈានមុខរបស់ចិន ដែលបានរួមចំណែក យ៉ាងសំខាន់ក្នុងការជំរុញ ការអភិវឌ្ឍសេដ្ឋកិច្ច និងសង្គមរបស់កម្ពុជា។
ឯកឧត្តមក៏បានអះអាង ជាថ្មីអំពីការប្តេជ្ញាចិត្ត របស់ក្រុមប្រឹក្សាអភិវឌ្ឍន៍កម្ពុជា ក្នុងការផ្តល់ការ សម្របសម្រួល បង្កលក្ខណៈងាយស្រួល និងគាំទ្រវិនិយោគិនគ្រប់រូប ស្របតាមច្បាប់ វិនិយោគរបស់កម្ពុជា ដែលមានភាពអនុគ្រោះ និងបើកចំហខ្ពស់។ ឯកឧត្តមបានជំរុញឱ្យ ក្រុមហ៊ុនចិនបន្តពង្រីក ការវិនិយោគលើគម្រោង បច្ចេកវិទ្យាបៃតង និងនវានុវត្តន៍ឌីជីថលទំនើបៗ ដែលមិនត្រឹមតែគាំទ្រ ដល់ផែនការអន្តរកាល ថាមពលស្អាតរបស់ កម្ពុជាប៉ុណ្ណោះទេ ប៉ុន្តែថែមទាំងជួយលើក កម្ពស់ខ្សែច្រវាក់តម្លៃឧស្សាហកម្ម និងអភិវឌ្ឍសមត្ថភាព បច្ចេកទេសក្នុងស្រុក ដើម្បីជំរុញ «របៀងអភិវឌ្ឍន៍ឧស្សាហកម្ម និងបច្ចេកវិទ្យា កម្ពុជា-ចិន» ឱ្យកាន់តែរឹងមាំ ប្រកបដោយបរិយាបន្ន និងចីរភាព។
សូមជម្រាបថា កិច្ចពិភាក្សានេះ ក៏បានផ្តោតលើការស្វែង រកឱកាសវិនិយោគលើ បច្ចេកវិទ្យាទំនើបៗ រួមមាន បញ្ញាសិប្បនិម្មិត (AI) និង បច្ចេកវិទ្យាយាន អាកាសគ្មានមនុស្សបើក (Drone) ដើម្បីជំរុញការធ្វើទំនើបកម្ម និងការអភិវឌ្ឍសេដ្ឋកិច្ចឌីជីថលរបស់ កម្ពុជាឱ្យកាន់តែមានសន្ទុះខ្លាំង ក្លានាពេលអនាគត៕
