(ខេត្តកំពង់ស្ពឺ)៖ កាលពីព្រឹកថ្ងៃទី២៨ ខែមិថុនា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីក្នុង ពិធីសម្ពោធដាក់ ឱ្យប្រើប្រាស់ផ្លូវបេតុង និងអ៊ុតកៅស៊ូថ្មីមួយខ្សែ ប្រវែង ៧គីឡូម៉ែត្រ ស្ថិតនៅតំបន់ឋានសួគ៌គិរីរម្យ ខេត្តកំពង់ស្ពឺ។
សមិទ្ធផលហេដ្ឋារចនាសម្ព័ន្ធនេះ ត្រូវបានកសាងឡើងដោយ ចំណាយថវិកាផ្ទាល់ខ្លួន របស់អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈប៊ុនថាំ អេសប្រេស ខូអិលធីឌី សរុបប្រមាណ ១,២២ លានដុល្លារអាមេរិក។
ការសម្ពោធផ្លូវនេះ ធ្វើឡើងស្របនឹងយុទ្ធនាការ «ទស្សនាកម្ពុជា នៅរដូវកាលបៃតង» ដែលកំពុងដំណើរការចាប់ ពីខែឧសភា ដល់ខែតុលា។ ក្នុងឱកាសនោះ ឯកឧត្តមរដ្ឋមន្ត្រី បានកោតសរសើរចំពោះ ទឹកចិត្តដ៏ថ្លៃថ្លារបស់អ្នកឧកញ៉ា សួរ វីរៈ ដែលបានរួមចំណែក អភិវឌ្ឍវិស័យទេសចរណ៍ និងហេដ្ឋារចនាសម្ព័ន្ធ។
ឯកឧត្តមបានគូសបញ្ជាក់ថា ខេត្តកំពង់ស្ពឺបច្ចុប្បន្ន បានប្រែមុខមាត់យ៉ាងឆាប់រហ័ស ពីខេត្តកសិកម្មទៅជា ខេត្តកសិ-ឧស្សាហកម្ម និងប៉ូលសេដ្ឋកិច្ចដ៏សំខាន់ ដោយសារមានការ ដឹកនាំប្រកបដោយ ប្រសិទ្ធភាពពីថ្នាក់ដឹកនាំខេត្ត និងការតភ្ជាប់ហេដ្ឋារចនា សម្ព័ន្ធខ្វាត់ខ្វែង។
ផ្លូវថ្មីនេះ ត្រូវបានចាត់ទុកថាជា «សរសៃឈាមសេដ្ឋកិច្ច» ដ៏សំខាន់មួយទៀត ដែលនឹងជួយសម្រួល ដល់ការធ្វើដំណើរ ជំរុញវិស័យទេសចរណ៍ និងផ្តល់អត្ថប្រយោជន៍ដល់ ប្រជាពលរដ្ឋក្នុងសហគមន៍ តំបន់គិរីរម្យ។
