(ភ្នំពេញ)៖ ដោយអនុវត្តតាម បទបញ្ជារបស់លោក ឧត្តមសេនីយ៍ឯក ង៉េង ជួ ប្រធាននាយកដ្ឋាន នគរបាលព្រហ្មទណ្ឌ កម្លាំងការិយាល័យ ព្រហ្មទណ្ឌកម្រិតស្រាល នៃនាយកដ្ឋាន នគរបាលព្រហ្មទណ្ឌ បានស៊ើបអង្កេត ស្រាវជ្រាវនិង ឃាត់ខ្លួនជនសង្ស័យចំនួន៣នាក់ ពាក់ព័ន្ធករណីគាស់ផ្ទះ និងប្រើប្រាស់គ្រឿងញៀន នៅសង្កាត់ស្ទឹងមានជ័យទី១ ខណ្ឌមានជ័យ។
ការចាប់ខ្លួនជនសង្ស័យ ខាងលើនេះធ្វើឡើង នៅថ្ងៃទី២៤ ខែមិថុនា ឆ្នាំ២០២៦ វេលាម៉ោង២០៖១៥នាទី កម្លាំងជំនាញការិយាល័យ ដឹកនាំដោយ លោកឧត្តមសេនីយ៍ទោ អ៊ុក ហេង លោកឧត្តមសេនីយ៍ត្រី វុទ្ធី វង្សវិបុល លោកវរសេនីយ៍ឯក ចាន់ សុភាព អនុប្រធាននាយកដ្ឋាន និងលោកវរសេនីយ៍ឯក ឡេង ប៊ុនហួរ នាយការិយាល័យ ព្រហ្មទណ្ឌកម្រិតស្រាល និងលោកវរសេនីយ៍ត្រី ណុប មុនី នាយរងការិយាល័យ។
សមត្ថកិច្ចបានប្រាប់អោយដឹងថា ជនសង្ស័យទាំង៣នាក់ ខាងលើ ទី១ឈ្មោះ កែវ ជេម ភេទប្រុស អាយុ៣០ឆ្នាំ ស្នាក់នៅ ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ ទី២ឈ្មោះ ញ៉ាញ់ មករា ភេទប្រុស អាយុ២២ឆ្នាំ ស្នាក់នៅ ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ និងទី៣ឈ្មោះ សឿន រតនៈ(ឌី) ភេទប្រុស អាយុ២១ឆ្នាំ ស្នាក់នៅ បន្ទប់ជួល ផ្លូវលំ សង្កាត់ព្រៃស ខណ្ឌដង្កោ។
សមត្ថកិច្ចបញ្ជាក់ថា វត្ថុតាងដកហូតបានរួមមាន ទោចក្រយាន(កង់) ចំនួន១គ្រឿង, ធុងបាស់ ចំនួន១គ្រឿង (របស់ជនរងគ្រោះ)។ ហើយចំពោះវត្ថុតាងនិង បានប្រគល់ជូនជន រងគ្រោះវិញរួចរាល់ផងដែរ។
បច្ចុប្បន្នជនសង្ស័យ ខាងលើត្រូវបានកម្លាំងជំនាញ បកសាងសុំណុំរឿង បញ្ជូនទៅកាន់អយ្យការ អមសាលាដំបូងរាជធានីភ្នំពេញ ដើម្បីចាត់ការបន្ដតាមនីតិវិធីច្បាប់៕
