ស្ទឹងត្រែង៖ នៅរសៀលថ្ងៃទី១៤ ខែមករា ឆ្នាំ២០២៦ រដ្ឋបាលខេត្តស្ទឹងត្រែង ដោយមានសម្របសម្រួលជាមួយមន្ទីរព័ត៌មានខេត្តស្ទឹងត្រែង បានរៀបចំពិធីសំណេះសំណាលជាមួយអ្នកសារព័ត៌មាន អ្នកផលិតមាតិកា និងមន្ត្រីទទួលបន្ទុកកិច្ចការព័ត៌មានតាមមន្ទីរ-អង្គភាពជុំវិញខេត្ត ក្រោមអធិបតីភាព ឯកឧត្តម សរ សុពុត្រា អភិបាលខេត្តស្ទឹងត្រែង ក្នុងបរិយាកាសស្និទ្ធស្នាល កក់ក្តៅ និងពោរពេញដោយស្មារតីសហការយ៉ាងល្អប្រសើរ។
ពិធីនេះ បានរៀបចំឡើងក្នុងគោលបំណងសំខាន់ៗចម្បង ដើម្បីសំណេះសំណាល និងបង្ហាញការយកចិត្តទុកដាក់របស់រដ្ឋបាលខេត្ត ចំពោះអ្នកសារព័ត៌មាន អ្នកផលិតមាតិកា និងមន្ត្រីទទួលបន្ទុកកិច្ចការព័ត៌មាន ព្រមទាំងជូនពរ ក្នុងឱកាសចូលឆ្នាំសកល ឆ្នាំ២០២៦ និងសំដៅបន្ថែមក្នុងការពង្រឹងភាពស្និទ្ធស្នាល ការយោគយល់ និងការសហការជិតស្និទ្ធរវាងរដ្ឋបាលខេត្ត និងសារព័ត៌មាននៅក្នុងខេត្ត ដើម្បីរួមចំណែកលើកកម្ពស់ប្រសិទ្ធភាពការងារផ្សព្វផ្សាយព័ត៌មានឲ្យបានត្រឹមត្រូវ រហ័ស និងមានគុណភាព។
ឯកឧត្តម សរ សុពុត្រា អភិបាលខេត្តស្ទឹងត្រែង បានមានប្រសាន៍លើកឡើងពីសារៈសំខាន់នៃតួនាទីអ្នកសារព័ត៌មាន និងអ្នកផលិតមាតិកា ដែលជាដៃគូសំខាន់របស់រដ្ឋបាល ក្នុងការផ្សព្វផ្សាយព័ត៌មានអំពីសភាពការណ៍ទូទៅ ការអភិវឌ្ឍ សមិទ្ធផល និងទិសដៅការងាររបស់ខេត្ត ជូនដល់ប្រជាពលរដ្ឋឲ្យបានទូលំទូលាយ។
ឯកឧត្តម ក៏បានជំរុញឲ្យអ្នកសារព័ត៌មានទាំងអស់ បន្តអនុវត្តវិជ្ជាជីវៈដោយមានសីលធម៌ ភាពទទួលខុសត្រូវ និងការគោរពច្បាប់ ស្របតាមគោលនយោបាយ និងទិសដៅរបស់រាជរដ្ឋាភិបាល។
លើសពីនេះ ឯកឧត្តមអភិបាលខេត្ត ក៏បានបង្ហាញ ទិដ្ឋភាពបច្ចុប្បន្ន ទីតាំងភូមិសាស្រ្ត សក្ដានុពល និងឱកាសអភិវឌ្ឍន៍ ព្រមទាំងការអនុវត្តគោលនយោបាយសំខាន់ៗរបស់រាជរដ្ឋាភិបាល ដែលបានដាក់ចេញនៅអាណត្តិទី៧ ក្រោមការដឹកនាំដ៏ឆ្លាតវៃរបស់ សម្តេចបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីឲ្យអ្នកសារព័ត៌មានយល់ដឹងកាន់តែច្បាស់ និងអាចផ្សព្វផ្សាយព័ត៌មានបានស្របតាមទិសដៅរួម។SamNeang
