(ភ្នំពេញ)៖ បន្តពីសកម្មភាព ដើរថ្មើរជើងចម្ងាយ ១០គីឡូម៉ែត្រនៅតំបន់ ប្រវត្តិសាស្ត្រកោះថ្ម នៅព្រឹកថ្ងៃទី២១ ខែមិថុនា ឆ្នាំ២០២៦នេះ ឯកឧត្តម ហ៊ុន ម៉ានី ប្រធានសហភាពសហព័ន្ធ យុវជនកម្ពុជារួមជាមួយ ឯកឧត្តម លោកជំទាវ អនុប្រធាន និងសមាជិក សមាជិកា ស.ស.យ.ក. បានអញ្ជើញរៀបចំពិធីបង្សុកូល ឧទ្ទិសកុសល ជូនវិញ្ញាណក្ខន្ធវីរកងទ័ពនិង ឥស្សរជនអ្នកស្នេហាជាតិ ដែលបានពលីជីវិតក្នុង បុព្វហេតុជាតិមាតុភូមិ នៅមហាចេតិយ ស្ថិតក្នុងតំបន់ ប្រវត្តិសាស្ត្រកោះថ្ម ខេត្តត្បូងឃ្មុំ។
ពិធីនេះបានរៀបចំឡើង ក្នុងបរិយាកាសប្រកប ដោយសេចក្តីគោរព និងដឹងគុណយ៉ាងជ្រាលជ្រៅ ចំពោះវីរភាព ព្រមទាំងការលះបង់ ដ៏ធំធេងរបស់វីរកងទ័ព ឥស្សរជនអ្នក ស្នេហាជាតិគ្រប់ជំនាន់ ដែលបានបូជា កម្លាំងកាយចិត្ត និងជីវិត ដើម្បីបុព្វហេតុជាតិ សន្តិភាព និងអនាគតរបស់ប្រជាជនកម្ពុជា។
ការរំឭកនេះ មិនត្រឹមតែជាការសម្ដែង នូវកតញ្ញូតាធម៌ចំពោះ អ្នកដែលបានពលីកម្មប៉ុណ្ណោះទេ ប៉ុន្តែថែមទាំងជាការ បញ្ជាក់ពីការប្ដេជ្ញាចិត្ត របស់យុវជនជំនាន់ក្រោយ ក្នុងការចងចាំប្រវត្តិសាស្ត្រ ថែរក្សាសន្តិភាព និងបន្តកសាងអនាគត កម្ពុជាឱ្យកាន់តែរឹងមាំ និងរីកចម្រើនតទៅមុខ ។
សូមជម្រាបថា កាលពីថ្ងៃទី២៩ មិថុនា សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ ព្រះមហាក្សត្រ និងជានាយ ឧត្តមសេនីយ៍ផ្កាយមាស៥ បានអញ្ជើញជាអធិបតី ក្នុងពិធីអបអរសាទរ ខួបអនុស្សាវរីយ៍លើកទី៤៩ ទិវានៃការចង ចាំដំណើរឆ្ពោះទៅការផ្តួល រំលំរបបប្រល័យពូជសាសន៍ ប៉ុល ពត និងខួបលើកទី៤៨ ថ្ងៃបង្កើតកងកម្លាំងប្រដាប់អាវុធ សាមគ្គីសង្គ្រោះជាតិកម្ពុជា នៅតំបន់ប្រវត្តិសាស្ដ្រ យោធាតេជោកោះថ្ម X16 ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ។
ទន្ទឹមគ្នានេះដែរមហា គ្រួសារសហភាព សហព័ន្ធយុវជនកម្ពុជា (ស.ស.យ.ក.) ដឹកនាំដោយឯកឧត្តម ហ៊ុន ម៉ានី បាននាំគ្នាដើរថ្មើរជើងចម្ងាយ ១០គីឡូម៉ែត្រ នៅតំបន់ប្រវត្តិសាស្ត្រកោះថ្ម ដើម្បីរំឭកវីរភាព និងស្មារតីលះបង់របស់អ្នកជំនាន់មុន នៅថ្ងៃប្រារព្ធខួបលើកទី៤៩ នៃដំណើរឆ្ពោះទៅការផ្ដួល រំលំរបបប្រល័យពូជសាសន៍ ប៉ុល ពត។
«យើងដើរថ្ងៃនេះ ដើម្បីចងចាំ ហើយជំរុញទឹកចិត្តដើម្បីបន្តឆ្ពោះទៅមុខ» នេះជាការលើកឡើងរបស់ឯកឧត្តម ហ៊ុន ម៉ានី ប្រធាន ស.ស.យ.ក. ដោយបញ្ជាកបន្ថែមថា ក្នុងតម្រាយផ្លូវជាង១០គីឡូម៉ែត្រនេះ អ្នកចូលរួមទាំងអស់ បានឃើញដោយផ្ទាល់ នូវស្លាកស្នាមប្រវត្តិសាស្រ្ត ដែលវីរបុរសជាតិបានឆ្លងកាត់ ក្នុងដំណាក់កាល ដ៏ប្រថុយប្រថានជាទីបំផុត។
ឯកឧត្តមបានលើកឡើងថា៖ «ក្រោមកម្តៅសូរ្យសែង និងត្រូវធ្វើដំណើរដោយថ្មើរជើង យើងគ្រាន់តែមានការហត់នឿយ និងក្តៅ តែបើធៀបនឹងអ្វីដែល យុវជនជំនាន់បានឆ្លងកាត់ គឺគ្មានអ្វីប្រៀបផ្ទឹមបានឡើយ។ ស្ថិតក្រោមភាពភ័យខ្លាច និងមិនប្រាកដប្រជា ពួកគាត់ត្រូវធ្វើដំណើរ ដោយលាក់ខ្លួនបំពួនអាត្មា ទាំងអារម្មណ៍នឹកស្រណោះ ដល់មាតុភូមិ និងអ្នកជាទីស្រលាញ់ ដែលកំពុងស្ថិត ក្រោមក្រញ៉ាំនៃរបបបីសាច។
ឯកឧត្តមបន្តថា យើងដើរបណ្តើរ នឹកឃើញដល់ទិដ្ឋភាពដែលពួកគាត់ឆ្លងកាត់ បានធ្វើឱ្យយើងនឹកឃើញឡើងវិញនូវការឈឺចាប់ដែលពួកគាត់ត្រូវស៊ូទ្រាំ។ នេះជាការលះបង់ដ៏ធំធេង និងដ៏មានតម្លៃកាត់ថ្លៃពុំបាន។
ថ្ងៃ២០មិថុនា គឺជានិមិត្តរូបនៃវីរភាព ការលះបង់ និងពលិកម្មដ៏ធំធេងរបស់ថ្នាក់ដឹកនាំ និងឥស្សរជនកម្ពុជា ជាពិសេសសម្តេចតេជោ ហ៊ុន សែន ដែលបានយកជីវិតធ្វើជាដើមទុន ដើម្បីបើកផ្លូវឱ្យជាតិមាតុភូមិរួចផុតពីសោកនាដកម្ម។ មេរៀនដែលថ្ងៃទី២០ ខែមិថុនា បានបន្សល់ទុកសម្រាប់មនុស្សគ្រប់ជំនាន់ គឺថា ទោះស្ថានភាពលំបាកដល់កម្រិតណាក៏ដោយ ក៏មិនត្រូវបោះបង់ជាតិ មិនត្រូវបោះបង់ទំនួលខុសត្រូវ និងមិនត្រូវបោះបង់ជំនឿលើអនាគតឡើយ។
ប្រវត្តិសាស្ត្របានបង្ហាញរួចមកហើយថា ការផ្លាស់ប្ដូរជោគវាសនារបស់ប្រជាជាតិមួយ មិនមែនចាប់ផ្ដើមពីកម្លាំងដ៏មហិមានោះទេ ប៉ុន្តែចាប់ផ្ដើមពីការសម្រេចចិត្តដ៏ក្លាហានមួយ។ ស្លាកស្នាមឈឺចាប់ទាំងអស់បានបង្រៀនយើងឱ្យចងចាំ និងមានស្មារតីជាតិយ៉ាងជ្រាលជ្រៅ ហើយទោះបីយើងរស់ក្នុងសន្តិភាព តែយើងមិនត្រូវភ្លេចរំឭកខ្លួនជាប្រចាំអំពីកាតព្វកិច្ចការពារជាតិមាតុភូមិគ្រប់កាលៈទេសៈ៕
