(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចឯកភាព ជាគោលការណ៍ ឱ្យរក្សាទុកកំណើន ភាគលាភនៃចំណូលពី សេវាទេសចរណ៍នៅ ដដែលសម្រាប់ជូនសហគមន៍ ចុងឃ្នៀស ទោះជាទៅ ថ្ងៃមុខតម្លៃប្រេងឥន្ធនៈចុះវិញក៏ដោយ ដើម្បីបង្កើនចំណូលជូន ប្រជាពលរដ្ឋនៅក្នុងសហគមន៍។
តាមរយៈបណ្តាញ សង្គមការងារផ្លូវការ នាព្រឹកថ្ងៃទី២១ ខែមិថុនា ឆ្នាំ២០២៦នេះ សម្តេចធិបតី បានលើកឡើងថាក្រោយពីត្រឡប់ មកពីប្រជុំនៅសហព័ន្ធរុស្សី សម្ដេច បានឆ្លៀតឱកាសនាំគ្រួសារ ទៅជិះទូកទៅទន្លេសាប នៅចុងឃ្នៀស ខេត្តសៀមរាប តាមការសន្យាជាមួយកូនៗ កាលពីថ្ងៃសៅរ៍ ទី ២០ មិថុនា ២០២៦។
សម្ដេចធិបតីក៏បានជួបជជែក លេងជាមួយបងប្អូនតំណាង សមាគមន៍អ្នករត់កាណូត ទេសចរណ៍ចុងឃ្នៀស ដោយបានស្ដាប់អំពី ស្ថានភាពជីវភាពរស់ នៅរបស់ប្រជាពលរដ្ឋ ក្នុងសហគមន៍ ក៏ដូចជាសំណូមពរ របស់ពួកគាត់ ជាពិសេសពាក់ព័ន្ធជាមួយនឹង ការបែងចែកភាគលាភ នៃចំណូលពីសេវាទេសចរណ៍ រវាងគ្រឹះស្ថានអង្គរនិងសហគមន៍។ ជាក់ស្ដែង ស្ថិតនៅក្នុងដំណាក់កាលដែល ប្រទេសយើងកំពុងរងសម្ពាធ ដោយសង្គ្រាមនៅមជ្ឈិមបូព៌ា ដែលធ្វើឱ្យប្រេងឥន្ធនៈឡើងថ្លៃ រាជរដ្ឋាភិបាលបាន សម្រេចឱ្យដំឡើងភាគលាភ សម្រាប់ផ្តល់ជូនដល់សហគមន៍ អ្នករត់កាណូតទេសចរណ៍ចុងឃ្នៀស ដើម្បីជួយសម្រាលបន្ទុក ដល់ប្រជាពលរដ្ឋក្នុងសហគមន៍។
ឆ្លើយតបទៅនឹងសំណូមពរ របស់តំណាងសហគមន៍ និងក្រោយពីបានពិភាក្សា ជាមួយឯកឧត្តមអគ្គនាយក នៃគ្រឹះស្ថានអង្គរ សម្ដេចធិបតី បានសម្រេចឯកភាព ជាគោលការណ៍ ឱ្យរក្សាទុកកំណើន ភាគលាភនៃចំណូលពី សេវាទេសចរណ៍នៅដដែល សម្រាប់ជូនសហគមន៍ ទោះជាទៅថ្ងៃមុខ តម្លៃប្រេងឥន្ធនៈចុះវិញក៏ដោយ ដើម្បីបង្កើនចំណូល ជូនប្រជាពលរដ្ឋនៅក្នុងសហគមន៍។
សម្ដេចធិបតី បានស្នើដល់សហគមន៍ បន្តការសាមគ្គីរួបរួមគ្នា ក្នុងការរៀបចំ និងផ្ដល់សេវាល្អ ប្រកបដោយតម្លាភាពជូនភ្ញៀវទេសចរណ៍ ដើម្បីធានាបាននូវទំនុកចិត្ត និងទាក់ទាញភ្ញៀវទេសចរណ៍ ជាតិនិងអន្តរជាតិបន្ថែមទៀត មកទស្សនានៅទីនោះ៕
